சிதம்பரம் நடராஜர் கோவிலில் மாநில அளவிலான நிபுணர் குழுவின் ஒப்புதல் பெறாமல் எந்தவொரு கட்டுமானப் பணிகளும் மேற்கொள்ளப்பட்டுள்ளதா என்பதை நேரில் ஆய்வு செய்து, விரிவான அறிக்கை தாக்கல் செய்ய புராதன சின்ன ஆணையக் குழுவுக்கு சென்னை உயர் நீதிமன்றம் உத்தரவிட்டுள்ளது.
இந்த வழக்கை இந்து அறநிலையத் துறை தாக்கல் செய்துள்ளது. கோபுரங்களைச் சுற்றி பூங்கா அமைக்கும் பணிகள் உள்ளிட்டவை தேவையான நிபுணர் ஒப்புதல் இன்றி நடைபெறுவதாகவும், அனுமதி பெறாமல் கோவிலுக்குள் எந்தக் கட்டுமானமும் செய்ய பொதுத் தீட்சிதர்கள் குழுவுக்கு தடை விதிக்க வேண்டும் என்றும் துறை கோரியுள்ளது.
நீதிபதிகள் ஜி.ஜெயச்சந்திரன், எஸ்.சவுந்தர் ஆகியோர் அடங்கிய சிறப்பு அமர்வில் நடந்த விசாரணையில், கடலூரைச் சேர்ந்த பக்தர் ஒருவரின் தரப்பில் ஆஜரான வழக்கறிஞர், கோவிலுக்குள் அனுமதியின்றி சிறிய மண்டபம் கட்டப்பட்டதாகவும், பரதநாட்டிய அரங்கை கோசாலையாக மாற்றியுள்ளதாகவும் குற்றம்சாட்டினார். மேலும் பக்தர்கள் பாதுகாப்பு தொடர்பான வசதிகளில் குறைபாடுகள் உள்ளதாகவும் தெரிவித்தார்.
இதற்கு பொதுத் தீட்சிதர்கள் தரப்பில், எந்தக் கட்டுமானமும் மேற்கொள்ளமாட்டோம் என்று ஏற்கனவே நீதிமன்றத்தில் உத்தரவாதம் அளித்துள்ளதாக தெரிவிக்கப்பட்டது. இதையடுத்து, இந்திய தொல்லியல் துறை ஓய்வு பெற்ற தலைமை இணை இயக்குநர் நம்பிராஜன் தலைமையில் 14 உறுப்பினர்கள் கொண்ட புராதன சின்ன ஆணையத்தை தமிழக அரசு ஜூலை 16 அன்று அமைத்துள்ளதாக நீதிமன்றம் குறிப்பிட்டது; புராதன கோவில்கள் மற்றும் கட்டடங்களில் அனுமதி உள்ளிட்ட விவகாரங்களை அந்த ஆணையம் கவனிக்கும் எனவும் கூறப்பட்டது.
சிதம்பரம் கோவிலில் நிபுணர் குழு ஒப்புதல் இன்றி பணிகள் நடந்ததா என்பதை ஆணையக் குழு ஆய்வு செய்து அறிக்கை தாக்கல் செய்ய வேண்டும் என உத்தரவிட்டு, வழக்கை ஆகஸ்ட் 27க்கு ஒத்திவைத்தது. ஆய்வுக்கு வருவது குறித்து முன்கூட்டியே தகவல் தெரிவிக்க வேண்டும் என்ற கோரிக்கைக்கு, அறநிலையத் துறை தரப்பில் முன்அறிவிப்பு வழங்கப்படும் எனவும் தெரிவிக்கப்பட்டது.
