புதுடில்லி: வினாத்தாள் கசிவு விவகாரத்தில் மத்திய அரசு துரிதமாக நடவடிக்கை எடுத்ததால், எதிர்க்கட்சிகளின் கோபம் “ஒன்றுமில்லாமல் போய்விட்டது” என்று மத்திய நிதியமைச்சர் நிர்மலா சீதாராமன் தெரிவித்துள்ளார்.
ஏஎன்ஐ செய்தி நிறுவனத்துக்கு அளித்த பேட்டியில், சில இளைஞர்கள் முதலில் தாங்களே பாதிக்கப்பட்டதாக நினைத்ததாகவும், பின்னர் அந்த சூழலை சாதகமாக பயன்படுத்தி மேலும் தயாராகி மதிப்பெண்களை உயர்த்தியதாகவும் கூறியதாக நிர்மலா தெரிவித்தார். அரசு பதிலளித்ததாகவும், பிரதமரும் இதற்கு பதிலளித்ததாகவும் அவர் கூறினார்.
அரசு உடனடியாக செயல்பட்டு குற்றவாளிகள் உரிய நேரத்தில் கைது செய்யப்பட்டதாகவும், மறு தேர்வு திட்டமிட்ட நேரத்தில் நடத்தப்பட்டு முடிவுகள் விரைவாக அறிவிக்கப்பட்டதாகவும் அவர் கூறினார். இதன் மூலம் மாணவர்கள் உயர்கல்வி நிறுவனங்களை தேர்வு செய்யும் நிலைக்கு வந்துள்ளதாகவும் தெரிவித்தார்.
மாணவர்கள் தொடர்பான தேர்வு விவகாரங்களில், வினாத்தாள் கசிந்து மறு தேர்வு நடத்தப்படும் போது பதற்றம் ஏற்படுவது இயல்பானது என்றும், அரசு தீவிரமாக எடுத்துக்கொள்ளாமல் விட்டால் எதிர்க்கட்சிகள் கோபம் காட்டுவது புரிந்துகொள்ளக்கூடியதே என்றும் நிர்மலா கூறினார். ஆனால் பிரதமர் மோடி துரிதமாக நடவடிக்கை எடுத்ததால் அந்த விமர்சனம் பலவீனமானதாகிவிட்டதாக அவர் தெரிவித்தார்.
மேலும், வினாத்தாளை கசிய விட்டவர்கள், வாங்கியவர்கள், விற்றவர்களுக்கு விரைவாக தண்டனை உறுதி செய்ய விரைவு நீதிமன்றம் அமைக்கப்படும் என்ற அறிவிப்புக்கு முன்பே, நீட் வினாத்தாள் கசிவில் தொடர்புடையவர்கள் கைது செய்யப்பட்டுவிட்டதாகவும் அவர் கூறினார்.
