ஸ்காட்லாந்தின் கிளாஸ்கோவில் நடைபெறும் காமன்வெல்த் விளையாட்டுப் போட்டிகளில், இந்தியாவுக்காக தமிழக வீரர் ராஜா முத்துப்பாண்டி பளுதூக்குதலில் வெள்ளிப் பதக்கம் வென்று சாதனை படைத்துள்ளார்.
ஆண்கள் 65 கிலோ எடைப்பிரிவில் போட்டியிட்ட அவர், ஸ்னாட்சில் 126 கிலோவும், க்ளீன் அண்ட் ஜெர்க்கில் 160 கிலோவும் தூக்கி மொத்தம் 286 கிலோ எடையுடன் இரண்டாம் இடத்தைப் பிடித்தார். மலேசியாவின் அஷ்னில் பின் பிடின் முகமது 299 கிலோ மொத்த எடையுடன் தங்கம் வென்றார்.
வெற்றி குறித்து ராஜா முத்துப்பாண்டி கூறுகையில், தங்கம் வெல்லும் அளவிலான திறனை முழுமையாக வெளிப்படுத்த முடியவில்லை என்றும், பயிற்சியில் செய்ததை ஒப்பிடும்போது போட்டியில் சிறப்பாக செயல்படவில்லை என்றும் தெரிவித்தார். இருப்பினும் வெள்ளி கிடைத்தது மகிழ்ச்சியளிப்பதாக கூறி, இந்திய விளையாட்டு ஆணையம், பளுதூக்கும் கூட்டமைப்பு மற்றும் பயிற்சியாளர் விஜய் ஷர்மாவுக்கு நன்றி தெரிவித்தார்.
போட்டியின் 4வது நாள் முடிவில் இந்தியா ஒரு தங்கம், 2 வெள்ளி, ஒரு வெண்கலம் என மொத்தம் 4 பதக்கங்களுடன் பதக்கப் பட்டியலில் 8வது இடத்தில் உள்ளது. இதில் வெண்கலத்தைத் தவிர மற்ற 3 பதக்கங்களும் பளுதூக்குதலிலேயே கிடைத்தது குறிப்பிடத்தக்கது.
தூத்துக்குடி மாவட்டத்தைச் சேர்ந்த ராஜா முத்துப்பாண்டிக்கு வாழ்த்து தெரிவித்த முதல்வர் விஜய், அவரது சாதனையைப் பாராட்டி தமிழக அரசின் சார்பில் ரூ.30 லட்சம் ஊக்கத்தொகை வழங்கப்படும் என அறிவித்தார். இந்த வெற்றி இளைஞர்களுக்கு புதிய உத்வேகமும் நம்பிக்கையும் அளிக்கட்டும் என்றும் அவர் குறிப்பிட்டார்.
