திருநெல்வேலியில் பட்டமளிப்பு விழா
திருநெல்வேலியில் நடைபெற்ற மனோன்மணியம் சுந்தரனார் பல்கலைக்கழகத்தின் 33வது பட்டமளிப்பு விழாவில், தமிழக கவர்னரும் பல்கலைக்கழக வேந்தருமான ராஜேந்திர விஸ்வநாத் அர்லேகர் மாணவர்களுக்கு பட்டங்களை வழங்கினார். தமிழக மாணவர்கள் வெளிப்படுத்தும் ஒழுக்கமும் பண்பாடும் இந்தியா முழுவதும் பரவ வேண்டும் என அவர் தெரிவித்தார்.
ஏற்பாடுகள் குறித்து மன்னிப்பு
விழாவில் உயர்கல்வித்துறை அமைச்சர் மற்றும் உயர்கல்வித்துறை கூடுதல் தலைமைச் செயலாளர் பங்கேற்கவில்லை என்றும், அவர்கள் வந்திருந்தால் மாணவர்களின் மகிழ்ச்சியையும் திருப்தியையும் பார்த்து மகிழ்ந்திருப்பார்கள் என்றும் அவர் கூறினார். மேலும், அனைவரையும் அரங்கிற்குள் அமர வைக்க முடியாமல் சிலர் வெளியே நின்றதாக கூறி, பட்டம் மற்றும் முனைவர் பட்டம் பெறும் மாணவர்களிடம் மனமார்ந்த வருத்தத்துடன் மன்னிப்பு கேட்டார்.
மாணவர்களின் பொறுமை, ஒழுக்கத்திற்கு பாராட்டு
மாணவர்களை எந்த காரணத்திற்காகவும் புறக்கணிக்கக் கூடாது என்றும், அவர்கள் நாட்டின் எதிர்காலம் மட்டுமல்ல நிகழ்காலமும் என்றும் கவர்னர் குறிப்பிட்டார். டெல்லி ஜந்தர் மந்தரில் சமீபத்தில் நடந்த நிகழ்வுகளை நினைவூட்டி, அங்கிருந்த இளைஞர்களுக்கும் இங்கு பட்டம் பெறும் மாணவர்களுக்கும் பெரிய வித்தியாசம் இருப்பதாக கூறி, மாணவர்களின் பொறுமை மற்றும் ஒழுக்கத்தை பாராட்டினார்.
‘விக் ஷித் பாரத்’ – ‘விக் ஷித் தமிழ்நாடு’
2047க்குள் இந்தியா வளர்ச்சி அடைந்த நாடாக மாற வேண்டும் என்ற பிரதமரின் ‘விக் ஷித் பாரத்’ இலக்கை அவர் நினைவூட்டினார். அந்த இலக்கை அடைய ஒவ்வொருவரும் தங்களது பங்களிப்பு என்ன என்பதை இப்போதே சிந்திக்க வேண்டும் என்றும், வளர்ச்சி அடைந்த இந்தியாவுக்கான பாதை வளர்ச்சி அடைந்த தமிழ்நாடு வழியாகவே செல்கிறது என்றும் கூறினார். அரசு திட்டங்களை மட்டும் எதிர்பார்க்காமல், தங்களது அறிவு மற்றும் திறமையால் சமூகத்திற்கு என்ன செய்ய முடியும் என்பதை இளைஞர்கள் சிந்திக்க வேண்டும் என வலியுறுத்தினார்.
மீண்டும் வந்து நேரடி கலந்துரையாடல்
மாணவர்களுடன் ஒரு நாள் முழுவதும் செலவிட விருப்பம் இருப்பதாக துணைவேந்தரிடம் தெரிவித்ததாகவும், மேடையில் இருந்து பேசுவது மட்டும் திருப்தி அளிக்கவில்லை என்றும் அவர் கூறினார். மாணவர்களுடன் நேரடியாக கலந்துரையாட மீண்டும் வருவேன் எனவும் தெரிவித்தார்.
