சென்னை: குடும்ப சொத்து தகராறைத் தொடர்ந்து தொடரப்பட்ட வழக்கை ஒட்டி, சென்னை உயர் நீதிமன்ற வளாகத்தில் உள்ள சமரச தீர்வு மையத்தில் தமிழக நிதி அமைச்சர் மரிய வில்சன் நேற்று ஆஜரானார்.
புகாரின்படி, 2022 ஆகஸ்ட் 8-ஆம் தேதி புதுச்சேரி எழில் நகரில் வசிக்கும் அமைச்சர் மரிய வில்சனின் அண்ணன் மரிய குலோத் மற்றும் அண்ணியின் வீட்டின் கதவை உடைத்து உள்ளே சென்று, ஆபாசமாக திட்டி, கட்டையால் தாக்கி, மிரட்டல் விடுத்ததாகவும், இதில் அமைச்சருடன் அவரது தந்தை நெஸ்தோர் தொடர்புடையதாகவும் கூறப்படுகிறது. இந்த புகாரின் அடிப்படையில் போலீசார் வழக்குப் பதிவு செய்தனர்; அது புதுச்சேரி முதலாவது குற்றவியல் நீதிமன்றத்தில் விசாரணையில் உள்ளது.
வழக்கில் குற்றப்பத்திரிகை நகலைப் பெற நேரில் ஆஜராக உத்தரவிட்டபோதும் அமைச்சர் தொடர்ந்து ஆஜராகவில்லை என கூறப்பட்ட நிலையில், கட்டாயம் ஆஜராக வேண்டும் என்று நீதிமன்றம் உத்தரவிட்டதாக தகவல்.
இதனைத் தொடர்ந்து வழக்கை ரத்து செய்யவும், நீதிமன்றத்தில் நேரில் ஆஜராகும் கட்டாயத்திலிருந்து விலக்கு அளிக்கவும் கோரி அமைச்சர் சென்னை உயர் நீதிமன்றத்தில் மனுத் தாக்கல் செய்தார். இது குடும்பப் பிரச்னை என்பதால், அமைச்சர், அவரது தந்தை மற்றும் குடும்பத்தினர் சமரச மையத்தில் ஆஜராக வேண்டும் என்று உயர் நீதிமன்றம் உத்தரவிட்டிருந்தது.
அதன்படி நேற்று மூன்றாவது முறையாக சமரச மையத்தில் அமைச்சர் உள்ளிட்டோர் பங்கேற்றனர். ஒரு மணி நேர பேச்சுவார்த்தையிலும் தீர்வு எட்டப்படாததால், ஆகஸ்ட் 12-ஆம் தேதி அமைச்சர் மற்றும் அவரது சகோதரர் மீண்டும் நேரில் ஆஜராக சமரச தீர்வு மையம் உத்தரவிட்டுள்ளது.
