‘வீ தி லீடர்ஸ்’ அமைப்பின் சார்பில், ஆகஸ்ட் 16ஆம் தேதி சென்னையில் அண்ணாமலை தலைமையில் பேரணி நடைபெறும் என அந்த அமைப்பு அறிவித்துள்ளது.
தமிழக பா.ஜ. முன்னாள் தலைவர் அண்ணாமலை, கட்சியிலிருந்து விலகி ‘வீ தி லீடர்ஸ்’ அமைப்பை தொடங்கி சமூக விழிப்புணர்வு நிகழ்ச்சிகளை நடத்தி வருகிறார். ஜூலை மாதம் முழுவதும் போதைக்கு எதிரான விழிப்புணர்வு நிகழ்ச்சிகள் நடத்தப்பட்டதாகவும் தெரிவிக்கப்பட்டுள்ளது.
ஆகஸ்ட் மாதத்தில் சுற்றுச்சூழல் தொடர்பான விழிப்புணர்வு நடவடிக்கைகளை மேற்கொள்ள திட்டமிட்டுள்ளதாக கூறப்பட்டுள்ளது. அதன்படி ஆகஸ்ட் 1 முதல் தமிழகமெங்கும் ஏரி, கால்வாய் சுத்தப்படுத்துதல் மற்றும் மரம் நடுதல் போன்ற பணிகள் நடைபெற உள்ளன.
ஆகஸ்ட் 2ஆம் தேதி தென்மாவட்டங்களின் கடலோர பகுதிகளில் சுத்தப்படுத்தும் பணிகளில் அண்ணாமலை பங்கேற்க உள்ளார். இதற்காக கன்னியாகுமரி, உவரி, தூத்துக்குடி, திருச்செந்தூர் பகுதிகளுக்கு அவர் செல்ல உள்ளதாக தெரிவிக்கப்பட்டுள்ளது.
ஆகஸ்ட் 16ஆம் தேதி சென்னையின் எழும்பூர் ராஜரத்தினம் மைதான சாலையில் அமைப்பினருடன் பேரணி செல்ல உள்ளதாகவும் அறிவிக்கப்பட்டுள்ளது. இதனிடையே, அமைப்பின் நிகழ்வுகளை ஒருங்கிணைக்க ‘வீ தி லீடர்ஸ்’ பெயரிலேயே மொபைல் செயலியை அண்ணாமலை நேற்று அறிமுகம் செய்தார்; ‘பிளே ஸ்டோர்’ மற்றும் ‘ஆப் ஸ்டோர்’ வழியாக பதிவிறக்கம் செய்து புதிய உறுப்பினர்கள் சேரவும், பழைய உறுப்பினர்கள் அடையாள எண்ணுடன் பதிவு செய்யவும் முடியும் என கூறப்பட்டுள்ளது.
