டாஸ்மாக் தொடர்பான முறைகேடு வழக்கில், திமுக முன்னாள் அமைச்சர் வி.செந்தில்பாலாஜி தாக்கல் செய்த முன்ஜாமின் மனுவை சென்னை உயர் நீதிமன்றம் தள்ளுபடி செய்துள்ளது. இந்த வழக்கை தமிழக லஞ்ச ஒழிப்பு மற்றும் ஊழல் தடுப்பு துறை (DVAC) பதிவு செய்துள்ளது.
இந்த வழக்கில் செந்தில்பாலாஜி, டாஸ்மாக் முன்னாள் நிர்வாக இயக்குநர் எஸ்.விசாகன், முன்னாள் மண்டல மேலாளர்கள் ராமதுரைமுருகன், பன்னீர்செல்வம், செந்தில்பாலாஜியின் நெருங்கிய நண்பர் ரத்தேஷ்ராஜ், முன்னாள் நேர்முக உதவியாளர் பாஸ்கர், கரூர் எஸ்.கார்த்திக் ஆகிய ஏழு பேர் மீது வழக்குப்பதிவு செய்யப்பட்டுள்ளதாக தெரிவிக்கப்பட்டது. மதுபான கொள்முதல் மற்றும் டெண்டர் முறைகேடு, சட்டவிரோதமாக ‘பார்’ நடத்தல், அதிக விலைக்கு மதுபான விற்பனை உள்ளிட்ட குற்றச்சாட்டுகள் இடம்பெற்றுள்ளன.
விசாரணையில், முதல் தகவல் அறிக்கையில் எந்த டெண்டரில் முறைகேடு நடந்தது, எவ்வளவு தொகை முறைகேடாக பெறப்பட்டது போன்ற விவரங்கள் இல்லை என்றும், பகைமை காரணமாக வழக்கு தொடரப்பட்டதாகவும் செந்தில்பாலாஜி தரப்பு வாதிட்டது. மேலும், வழக்கு தொடர்பான ஆவணங்கள் டாஸ்மாக் நிறுவனத்திடமே உள்ளதால் கைது செய்து விசாரிக்க அவசியமில்லை; விசாரணைக்கு ஒத்துழைக்கத் தயாராக இருப்பதாகவும் கூறப்பட்டது.
இதற்கு எதிராக அரசு தரப்பு, முறைகேடுகள் ரூ.100 கோடி வரை இருக்கலாம் என்பதால் விரிவான விசாரணை தேவை என்றும், முன்ஜாமின் வழங்கக்கூடாது என்றும் வாதிட்டது. இரு தரப்பு வாதங்களையும் கேட்ட நீதிபதி ஜி.கே.இளந்திரையன், ஆவணங்களைப் பார்க்கும் போது அதிகார துஷ்பிரயோகம் நடந்திருக்கலாம் என்பதற்கான முகாந்திரம் இருப்பதாகக் கூறி, காவலில் வைத்து விசாரிக்க அவசியம் உள்ளதால் முன்ஜாமின் வழங்க முடியாது என உத்தரவிட்டார்.
இதனிடையே, செந்தில்பாலாஜி உள்ளிட்டோருடன் தொடர்புடைய இடங்களில் DVAC 45 இடங்களில் சோதனை நடத்தியதாகவும், கைப்பற்றப்பட்ட ஆவணங்களின் அடிப்படையில் விசாரணை மேற்கொள்ளப்பட உள்ளதாகவும் தெரிவிக்கப்பட்டது. இந்த வழக்கில் குற்றம் சாட்டப்பட்ட ஏழு பேரும் நேரில் ஆஜராக வேண்டும் என சம்மன் அனுப்ப போலீசார் திட்டமிட்டுள்ளனர்.
