தென்மேற்கு பருவமழை தீவிரமடைந்ததைத் தொடர்ந்து கேரளாவின் இடுக்கி, கோட்டயம் உள்ளிட்ட பல மாவட்டங்களில் கனமழை பெய்து வருகிறது. இதன் காரணமாக பல இடங்களில் நிலச்சரிவும் வெள்ளப்பெருக்கும் ஏற்பட்டுள்ள நிலையில், மாயமானவர்களை தேடும் பணி முழு வீச்சில் நடைபெற்று வருகிறது.
இடுக்கி மாவட்டம் அடூர்மலை பகுதியில் விடியற்காலையில் ஏற்பட்ட நிலச்சரிவில், பாறைகள் மற்றும் மண் ஒரு வீட்டின் மீது சரிந்து விழுந்ததில் சுமதி (65) உயிரிழந்தார். அவரது கணவர் ரவி மற்றும் மகன் ரதீஷ் உயிர்தப்பினர்.
அதே மாவட்டத்தின் வாகமன் பகுதியில் ஒரு வீட்டின் மீது ஏற்பட்ட நிலச்சரிவில் பிரபாகரன் நாயர் (77) உயிரிழந்தார். கோட்டயம் மாவட்டத்தைச் சேர்ந்த அவர், உறவினர் வீட்டில் தங்கியிருந்தபோது விபத்தில் சிக்கினார்.
கோட்டயம் மாவட்டம் பூஞ்சார் பைனித்தோட்டம் பகுதியில் நிகழ்ந்த நிலச்சரிவில் இடிபாடுகளில் சிக்கி ரெஜினா ஜானி (46) மற்றும் அவரது மகன் ஜோசபின் (24) உயிரிழந்தனர். பல பகுதிகளில் வெள்ளம் மற்றும் நிலச்சரிவால் போக்குவரத்து பாதிக்கப்பட்டுள்ளது.
உப்பத்துறை பகுதியில் நிறுத்தி வைக்கப்பட்டிருந்த போலீஸ் வாகனம் சேதமடைந்ததாக தெரிவிக்கப்பட்டது. புல்லக்காயாறு ஆற்றில் வெள்ளப்பெருக்கு ஏற்பட்டதால் கொக்கையார் பகுதியில் உள்ள தாழ்வான தரைப்பாலம் நீரில் மூழ்கியது. கட்டப்பனா–வழுவாரா சாலையில் நிலச்சரிவால் போக்குவரத்து தடைபட்டதுடன், நெல்லிமலை பகுதியிலும் சாலை துண்டிக்கப்பட்டது. கோட்டயம் மாவட்டத்தின் எராட்டுப்பேட்டை, காஞ்சிரப்பள்ளி, கூட்டிக்கல், எருமேலி பகுதிகள் வெள்ளத்தால் பாதிக்கப்பட்டுள்ளன; மேலும் பத்தனம்திட்டா, கோழிக்கோடு, மலப்புரம், கண்ணூர், பாலக்காடு மாவட்டங்களிலும் வெள்ளப்பெருக்கும் சிறிய அளவிலான நிலச்சரிவுகளும் பதிவாகியுள்ளன.
