சென்னை கொளத்தூர் தொகுதியில் சமீபத்தில் நடந்த தேர்தலில் தி.மு.க. தலைவர் மு.க. ஸ்டாலின் போட்டியிட்டு தோற்ற நிலையில், அங்கு பயன்படுத்தப்பட்ட மின்னணு ஓட்டுப்பதிவு இயந்திரங்கள் (EVM) தொடர்பான சரிபார்ப்பு பணிகள் நடைபெற்று வருகின்றன. அந்த பணிகளை பார்வையிட்ட தி.மு.க. எம்.பி. என்.ஆர். இளங்கோ, பல்வேறு குறைபாடுகள் கண்டறியப்பட்டதாக குற்றம்சாட்டினார்.
14 ஓட்டுச்சாவடிகளில் பயன்படுத்தப்பட்ட இயந்திரங்கள் முறையாக செயல்பட்டனவா என்பதை சரிபார்க்கும் பணிகள் நடப்பதாக அவர் கூறினார். கடந்த மாதம் 29ம் தேதி இரண்டு இயந்திரங்கள் சரிபார்க்கப்பட்டதில் பிரச்னை இல்லை என்றும், 30ம் தேதி சரிபார்க்கப்பட்ட இரண்டு இயந்திரங்களில் யாருக்கு ஓட்டளித்தோம் என்பதை காட்டும் VVPAT கருவி செயல்படவில்லை என்றும், 31ம் தேதி மற்றொரு ஓட்டுச்சாவடியில் பயன்படுத்தப்பட்ட VVPATவும் வேலை செய்யவில்லை என்றும் தெரிவித்தார்.
மேலும், ஓட்டுச்சாவடி எண் 75ல் சரிபார்த்த போது முகவரி அட்டையில் எண்கள் வேறுபட்டதாகவும், ஓட்டுச்சாவடி 175ல் இருந்த நான்கு இயந்திரங்களிலும் புத்தம் புதிய முகவரி அட்டைகள் பொருத்தப்பட்டிருந்தாலும் முகவரிகள் பூர்த்தி செய்யப்படவில்லை என்றும் கூறினார். அதேபோல், பின்பக்கத்திற்கு பதிலாக முன்பக்கத்தில் ‘சீல்’ வைக்கப்பட்டிருந்ததாகவும் அவர் குற்றம்சாட்டினார்.
இதுவரை எட்டு இயந்திரங்கள் சரிபார்த்ததில் மூன்றில் பிரச்னை இருந்ததாகக் கூறிய இளங்கோ, இது சுமார் 30% என குறிப்பிட்டார். இது முறையான தேர்தல் அல்ல என்பது அறிவியல்பூர்வமாகவும் சட்டப்பூர்வமாகவும் தெரியவந்துள்ளதாக கூறி, மாவட்ட தேர்தல் அதிகாரியிடம் கடிதம் அளித்துள்ளதாகவும், விரைவில் சென்னை உயர் நீதிமன்றம் அல்லது உச்ச நீதிமன்றத்தை நாடுவோம் என்றும் தெரிவித்தார்.
இதற்கிடையில், சென்னை மாநகராட்சி கமிஷனர் சமீரன், முதற்கட்டமாக ஓட்டுப்பதிவுக்கு பயன்படுத்தப்பட்ட இயந்திரங்களை அடையாளம் காண்பதும், பதிவான ஓட்டு விவரங்களை வேட்பாளர் பிரதிநிதிகள் முன்னிலையில் சரிபார்த்து சரியாக உள்ளதாக சான்றளிப்பதும் நடைபெற்றதாக கூறினார். மேலும், EVM செயல்பாட்டை சோதிக்க குறைந்தது 500 முதல் 1,400 வரை மாதிரி ஓட்டுப்பதிவு செய்யப்படும் என்றும், இதுவரை எந்த தவறும் நடக்கவில்லை என்றும் தெரிவித்தார். புகார்தாரர் வராவிட்டாலும், மற்ற வேட்பாளர்கள் முன்னிலையில் மீதமுள்ள இயந்திரங்களும் சரிபார்க்கப்படும் என்றும் அவர் கூறினார்.
