கரூர் நெரிசலில் உயிரிழந்தவர்களின் குடும்பத்தினருக்கு வழங்கப்பட்ட அரசு பணி நியமன அரசாணைகளை ரத்து செய்த சென்னை உயர் நீதிமன்ற மதுரை கிளை உத்தரவுக்கு எதிராக, உச்ச நீதிமன்றத்தில் மேலும் இரண்டு மேல்முறையீடு மனுக்கள் தாக்கல் செய்யப்பட்டுள்ளன.
கரூர் மாவட்டம் வேலுசாமிபுரத்தில் கடந்த ஆண்டு செப்டம்பர் 27 அன்று, த.வெ.க. தலைவர் மற்றும் தற்போதைய முதல்வர் விஜய் பிரசாரம் செய்த நிகழ்ச்சியின் போது ஏற்பட்ட கூட்ட நெரிசலில் 41 பேர் உயிரிழந்ததாக தெரிவிக்கப்பட்டுள்ளது.
இதையடுத்து, கடந்த மாதம் 10ஆம் தேதி கரூரில் நடைபெற்ற நிகழ்ச்சியில், உயிரிழந்தவர்களின் குடும்பத்தினருக்கு கருணை அடிப்படையில் அரசு பணிக்கான அரசாணைகளை முதல்வர் வழங்கினார். இந்த நியமனங்களை எதிர்த்து மதுரை கிளையில் வழக்கு தொடரப்பட்டது.
நீதிபதிகள் சி.வி. கார்த்திகேயன், ஆர். சக்திவேல் ஆகியோர் அடங்கிய அமர்வு, அரசு பணிகளை “கொடையாக” அல்லது துயர சம்பவத்துக்குப் பிந்தைய கருணை நிவாரணமாக வழங்க முடியாது எனக் கூறி, பணி நியமன ஆணைகளை ரத்து செய்தது.
இந்த உத்தரவுக்கு எதிராக தமிழக அரசு ஏற்கெனவே உச்ச நீதிமன்றத்தில் மேல்முறையீடு செய்துள்ளது. இது மாநில அரசின் கொள்கை முடிவின் அடிப்படையிலான நடவடிக்கை என்பதால் நீதிமன்றம் தலையிடக் கூடாது என அந்த மனுவில் தெரிவிக்கப்பட்டுள்ளது. இதற்கிடையில், பிரபாகரன் செல்வகுமார் மற்றும் பி. ஆனந்த ஜோதி ஆகியோர் தனித்தனியாக மேல்முறையீடு மனுக்களை தாக்கல் செய்துள்ளனர்; இவை அரசின் மனுவுடன் சேர்த்து விரைவில் விசாரணைக்கு வரலாம் என எதிர்பார்க்கப்படுகிறது.
