சென்னையில், பரங்கிமலை காவல் நிலைய இன்ஸ்பெக்டர் புஹாரி மீது வர்த்தகரிடம் மிரட்டி பணம் பறித்ததாக புகார் எழுந்ததைத் தொடர்ந்து, அவரை போலீசார் கைது செய்துள்ளனர்.
பழைய வண்ணாரப்பேட்டை பகுதியைச் சேர்ந்த அகில்குமார் (35) என்பவர், ஷேர் மார்க்கெட் தொடர்பான தொழிலில் ஈடுபட்டு வருவதாகவும், சென்னை போலீஸ் கமிஷனர் அலுவலகத்தில் புகார் அளித்ததாகவும் தெரிவிக்கப்பட்டுள்ளது. 2024-ல் தமிழக பகுஜன் சமாஜ் கட்சியின் மாநிலத் தலைவராக இருந்த ஆம்ஸ்ட்ராங் கொலை வழக்கில் தன்னை குற்றவாளியாக சேர்த்துவிடுவேன் என இன்ஸ்பெக்டர் மிரட்டியதாக அவர் கூறியுள்ளார்.
புகாரின் படி, கிருஷ்ணன் என்ற நபர் பயன்படுத்திய மொபைல் எண் தனது பெயரில் இருந்ததாகக் கூறி, அதனை காரணமாக்கி அழுத்தம் கொடுத்ததாக அகில்குமார் தெரிவித்துள்ளார். 2018-ல் கிருஷ்ணன் கேட்டுக்கொண்டதால் ஒரு சிம் கார்டை வழங்கியது உண்மை என்றாலும், வழக்குக்கும் தன்னுக்கும் எந்த தொடர்பும் இல்லை என அவர் விளக்கமளித்ததாக கூறப்பட்டுள்ளது.
இருப்பினும் ரூ.40 லட்சம் பெற்றுக்கொண்டதாகவும், அதன் பின்னர் இரண்டு ஆண்டுகளாக பல காரணங்களை கூறி தொடர்ந்து பணம் பறித்ததாகவும் அவர் குற்றம்சாட்டியுள்ளார். சமீபத்தில் இணை கமிஷனர் அனுப்பியதாக கூறி வந்து, உடனடியாக ரூ.5 லட்சம் தராவிட்டால் போதைப் பொருள் வழக்கில் கைது செய்வேன் என பகிரங்கமாக மிரட்டியதாகவும் புகாரில் குறிப்பிடப்பட்டுள்ளது.
இந்த புகாரைத் தொடர்ந்து, சென்னை போலீஸ் கமிஷனர் அமல்ராஜ் உத்தரவின் பேரில் இன்ஸ்பெக்டர் புஹாரியை நேற்றிரவு காத்திருப்போர் பட்டியலுக்கு மாற்றியதாக தெரிவிக்கப்பட்டது. பின்னர், இன்ஸ்பெக்டர் புஹாரியை போலீசார் கைது செய்தனர்.
