அமெரிக்காவின் புளோரிடாவைச் சேர்ந்த 18 வயது நாதன் தாமஸ், உலகின் மிக இளம் வயது பேராசிரியர் என்ற சாதனையைப் படைத்து கின்னஸ் உலக சாதனைப் புத்தகத்தில் இடம்பிடித்துள்ளார். 18 வயது 346 நாட்களில் அவர் இந்த அங்கீகாரத்தை பெற்றதாக தெரிவிக்கப்பட்டுள்ளது.
இதன் மூலம், 1717ஆம் ஆண்டில் 19 வயதில் பேராசிரியரான ஸ்காட்லாந்து கணிதவியலாளர் கோலின் மக்லாரின் வைத்திருந்த சாதனை முறியடிக்கப்பட்டதாக கூறப்படுகிறது. 306 ஆண்டுகளாக மாற்றமின்றி இருந்த பதிவை தாமஸ் கடந்துள்ளார்.
மேலும், 2008ஆம் ஆண்டில் 18 வயதில் உலகின் மிக இளம் பெண் பேராசிரியராக பதிவான அலியா சாபூரை விட நாதன் தாமஸ் 16 நாட்கள் இளையவர் என்றும் செய்தி குறிப்பிடுகிறது. இதனால் ஆண்-பெண் இருபாலரிலும் ‘உலகின் இளம் பேராசிரியர்’ என்ற சாதனை தாமஸின் பெயரில் பதிவாகியுள்ளது.
நாதன் தாமஸ் தற்போது மியாமி டேட் கல்லூரியில் பொறியியல் பாடங்களை கற்பிக்கிறார். 10 வயதிலேயே பள்ளிப் படிப்புடன் இணைந்து கல்லூரி பாடங்களை தொடங்கிய அவர், 14 வயதில் புளோரிடா சர்வதேசப் பல்கலைக்கழகத்தில் உயர்கல்வியை ஆரம்பித்து, 18 வயதுக்குள் மின் பொறியியலில் இளங்கலை மற்றும் முதுகலை பட்டங்களை முடித்துள்ளார்.
