புதுடில்லி: பார்லிமென்ட் மழைக்கால கூட்டத்தொடரை சீராக நடத்த விடாமல் காங்கிரசும், எதிர்க்கட்சிகளின் ‘இண்டி’ கூட்டணியும் திட்டமிட்டு அமளியில் ஈடுபடுகின்றன என்று பா.ஜ. குற்றஞ்சாட்டியுள்ளது.
டில்லியில் உள்ள பா.ஜ. தலைமையகத்தில் செய்தியாளர்களிடம் பேசிய கட்சியின் செய்தித் தொடர்பாளரும், லோக்சபா எம்.பி.யுமான சம்பித் பத்ரா, ஜூலை 20-ஆம் தேதி கூட்டத்தொடர் தொடங்கியதிலிருந்து தொடர்ந்து இடையூறுகள் ஏற்படுத்தப்படுவதால் லோக்சபா, ராஜ்யசபா ஆகிய இரு சபைகளும் மீண்டும் மீண்டும் ஒத்திவைக்கப்படுவதாக கூறினார்.
‘நீட்’ வினாத்தாள் கசிவு, டில்லி ஜந்தர் மந்தரில் மாணவர்கள் மீது போலீஸ் தடியடி, பெல்லட் குண்டுகள் பயன்படுத்தப்பட்டதாக கூறப்படும் விவகாரம் உள்ளிட்டவற்றை முன்வைத்து ‘இண்டி’ கூட்டணி பிரச்னைகளை எழுப்பி வருவதாகவும், இதையே காரணமாக்கி அலுவல்களை நடக்க விடாமல் தடுக்கப்படுவதாகவும் அவர் தெரிவித்தார்.
ஒவ்வொரு கூட்டத்தொடருக்கும் மக்களின் வரிப்பணத்தில் பல கோடி ரூபாய் செலவாகும் நிலையில், அலுவல்களை நடத்த விடாமல் தொடர்ந்து அமளி செய்வது வரிப்பணத்தை வீணாக்குவதாகவும் பத்ரா குற்றம் சாட்டினார்.
மேலும், காங்கிரஸ் அல்லது அதன் கூட்டணி ஆளும் மாநிலங்களில் வினாத்தாள் கசிவு நடந்தால் மவுனம் காக்கும் காங்கிரஸ், பா.ஜ. ஆளும் மாநிலங்களில் ஏதாவது நடந்தால் தீவிரமாக எதிர்வினை காட்டுவதாக கூறி, கர்நாடகா மற்றும் ஜார்க்கண்டை உதாரணமாக குறிப்பிட்டார். பார்லிமென்ட் வளாகத்தில் எதிர்க்கட்சிகள் நடத்தியதாக கூறப்படும் வீதி நாடகத்தையும் அவர் விமர்சித்ததுடன், ராகுல் காந்தி குறித்து கடுமையான கருத்துகளையும் தெரிவித்தார்.
