டெல்லியில் நடந்த போராட்டங்களின்போது போலீசார் மேற்கொண்ட நடவடிக்கைகள் குறித்து மத்திய உள்துறை அமைச்சர் அமித் ஷா அறிக்கை வெளியிட வேண்டும் என எதிர்க்கட்சிகள் தொடர்ந்து வலியுறுத்தி வந்த நிலையில், செவ்வாய்க்கிழமை ராஜ்யசபாவில் கடும் பரபரப்பு ஏற்பட்டது.
அவையில் எதிர்க்கட்சி எம்.பி.க்கள் பிரதமர் நரேந்திர மோடியையும், அமித் ஷாவையும் குறிவைத்து முழக்கங்கள் எழுப்பி, அவர்கள் சபைக்கு வந்து விளக்கம் அளிக்க வேண்டும் என்று வலியுறுத்தினர். இதனால் அவை சூழல் மேலும் பதற்றமடைந்தது.
இந்தக் குழப்பத்தின் நடுவில், உள்துறை அமைச்சரை ராஜ்யசபாவுக்கு வரவழைத்து பதிலளிக்குமாறு அவை தலைவர் சி.பி. ராதாகிருஷ்ணன் உத்தரவிட வேண்டும் என எதிர்க்கட்சித் தலைவர் மல்லிகார்ஜுன் கார்கே வலியுறுத்தினார்.
இதற்கு மத்திய அமைச்சர் கிரண் ரிஜிஜூ கடும் எதிர்ப்பு தெரிவித்தார். கடந்த ஏழு நாட்களாக இதே விஷயத்தை எதிர்க்கட்சி எழுப்பி வருவதாகவும், இவ்வாறு உத்தரவிடுவதற்கு விதிமுறைகள் அனுமதிக்கவில்லை என்றும் அவர் கூறினார். எதிர்க்கட்சி எந்த விதியையும் மேற்கோள் காட்டவில்லை என்றும், அவை தலைவருக்கு கட்டளையிட முடியாது; கோரிக்கைகளை மட்டுமே முன்வைக்க முடியும் என்றும் அவர் வலியுறுத்தினார்.
மேலும், எதிர்க்கட்சித் தலைவர் பதவியை கார்கே தவறாகப் பயன்படுத்துகிறார் என்றும், ஒரே பிரச்னையை மீண்டும் மீண்டும் அவையில் எழுப்ப முடியாது என்றும் ரிஜிஜூ குற்றம்சாட்டினார்.
