புதுடில்லி: கடந்த ஆண்டுடன் ஒப்பிடுகையில் 2024-25 நிதியாண்டில் மாநில அரசியல் கட்சிகள் பெற்ற நன்கொடை தொகை கிட்டத்தட்ட மூன்று மடங்கு உயர்ந்துள்ளதாக ஜனநாயக சீர்திருத்த சங்கம் (ஏடிஆர்) வெளியிட்ட அறிக்கையில் தெரிவிக்கப்பட்டுள்ளது.
டில்லியை தலைமையிடமாகக் கொண்ட ஏடிஆர், தேர்தல் ஆணையத்திடம் கட்சிகள் சமர்ப்பிக்கும் விவரங்களின் அடிப்படையில் அரசியல் நிதி உள்ளிட்ட தகவல்களை தொகுத்து வெளியிடுகிறது. அதன் சமீபத்திய வெளியீட்டில், 2023-24ல் ₹347.69 கோடியாக இருந்த மாநில கட்சிகளின் நன்கொடை 2024-25ல் ₹1,051.56 கோடியாக உயர்ந்ததாக கூறப்பட்டுள்ளது.
2024-25ல் ₹365.78 கோடி நன்கொடை பெற்ற திமுக முதலிடத்தில் இருப்பதாக அறிக்கை தெரிவிக்கிறது. இதில் ₹300.64 கோடி அடையாளம் தெரிவிக்கப்படாத நன்கொடையாளர்களிடமிருந்து வந்ததாகவும் குறிப்பிடப்பட்டுள்ளது.
மேற்கு வங்கத்தின் திரிணமுல் காங்கிரஸ் ₹184.96 கோடியுடன் இரண்டாம் இடத்திலும், ஆந்திராவின் ஒய்.எஸ்.ஆர். காங்கிரஸ் ₹140.04 கோடியுடன் மூன்றாம் இடத்திலும் உள்ளது. 2023-24ல் தெலுங்கு தேசம் கட்சி ₹100.19 கோடி பெற்று முதலிடத்தில் இருந்ததாகவும் ஏடிஆர் கூறியுள்ளது.
மேலும், திரிணமுல் காங்கிரஸ், ஒய்.எஸ்.ஆர். காங்கிரஸ், அ.தி.மு.க., பிஜு ஜனதா தளம் போன்ற கட்சிகள் பெருநிறுவனங்கள் மற்றும் வணிக நிறுவனங்களின் நன்கொடைகளையே பெரும்பாலும் சார்ந்திருந்ததாக அறிக்கை சுட்டிக்காட்டுகிறது. இத்தகைய நன்கொடைகள் 2023-24ல் ₹227.61 கோடியும், 2024-25ல் ₹644.93 கோடியும் வழங்கப்பட்டதாகவும், இரு ஆண்டுகளிலும் ‘ப்ரூடன்ட் எலக்டோரல் டிரஸ்ட்’ மொத்தம் ₹434 கோடி வழங்கி மிகப்பெரிய நன்கொடையாளராக இருந்ததாகவும் தெரிவிக்கப்பட்டுள்ளது.
