இந்தியா–சீனா இடையிலான எல்லை தொடர்பான நிலுவை பிரச்னைகள் மற்றும் பிற விவகாரங்களுக்கு துாதரக, ராணுவ மட்ட பேச்சுவார்த்தைகள் மூலம் தீர்வு காண இரு நாடுகளும் இணைந்து முடிவு செய்துள்ளதாக இந்திய வெளியுறவு அமைச்சகம் தெரிவித்துள்ளது.
2020-ம் ஆண்டு கிழக்கு லடாக்கின் கல்வான் பகுதியில் நடந்த மோதலுக்குப் பிறகு இந்தியா–சீனா உறவு பாதிக்கப்பட்டது. அதன் பின்னர் எல்லையில் அமைதி, ஸ்திரத்தன்மை நிலவச் செய்ய சிறப்பு பிரதிநிதிகள், ராணுவ தளபதிகள் மற்றும் இந்தியா–சீனா எல்லை விவகாரங்களுக்கான ஆலோசனை மற்றும் ஒருங்கிணைப்பு அமைப்பு (WMCC) வழியாக தொடர்ந்து பேச்சுகள் நடைபெற்று வருகின்றன.
இந்த நிலையில், டெல்லியில் நேற்று WMCC கூட்டம் நடைபெற்றது. இதில் எல்லை வரையறை, எல்லை நிர்வாகம், எல்லை தாண்டிய ஒத்துழைப்பு உள்ளிட்ட அம்சங்கள் குறித்து இரு தரப்பும் ஆலோசனை நடத்தின.
எல்லைக் கட்டுப்பாட்டு கோடு (LAC) பகுதியில் நிலவும் சூழலை இரு தரப்பும் ஆய்வு செய்ததாக வெளியுறவு அமைச்சகம் கூறியது. எல்லைப் பகுதிகளில் அமைதி மற்றும் ஸ்திரத்தன்மையை பேணுவது இருதரப்பு உறவை முன்னேற்றுவதற்கு அவசியம் எனவும் வலியுறுத்தப்பட்டது.
மேலும், நிலுவையில் உள்ள அனைத்து பிரச்னைகளுக்கும் தற்போதுள்ள துாதரக மற்றும் ராணுவ பேச்சு அமைப்புகள்—குறிப்பாக அந்தந்த பகுதி ராணுவ தளபதிகள் மட்டத்திலான சந்திப்புகள்—மூலம் தீர்வு காண ஒப்புக் கொண்டதாக அறிக்கையில் தெரிவிக்கப்பட்டுள்ளது. இதன் மூலம் எல்லையில் பதற்றம் தவிர்க்கப்பட்டு, தவறான புரிதல்களால் சம்பவங்கள் ஏற்படாமல் தடுக்கும் நோக்கம் வலியுறுத்தப்பட்டுள்ளது.
