மேகமலை பகுதியில் உள்ள மலைக்கிராம மக்களை வெளியேற்றும் நடவடிக்கையை கைவிட வேண்டும் என வலியுறுத்தி, தேனி கலெக்டர் அலுவலகம் முன் ஆர்ப்பாட்டம் நடைபெற்றது. தமிழ்நாடு விவசாயிகள் சங்கம் சார்பில் நடந்த இந்த போராட்டத்தில், உச்ச நீதிமன்ற உத்தரவுக்கு எதிராக தமிழக அரசு சீராய்வு மனு தாக்கல் செய்ய வேண்டும் என கோரப்பட்டது.
போராட்டத்தில் பேசியவர்கள், ஆகஸ்ட் 28க்குள் மலைப்பகுதியில் உள்ள சுமார் 5,000 குடும்பங்களை வெளியேற்ற வேண்டும் என தீர்ப்பில் கூறப்பட்டுள்ளதாகவும், அரசு ஒத்துழைக்காவிட்டால் துணை ராணுவத்தை பயன்படுத்தும் வகையிலும் குறிப்பிடப்பட்டுள்ளதாகவும் தெரிவித்தனர். வன உரிமைச் சட்டத்தின் அமலாக்கத்தில் மாவட்ட நிர்வாகம் மற்றும் தொடர்புடைய துறைகள் நடவடிக்கை எடுக்காததே இந்நிலைக்கு காரணம் எனவும் அவர்கள் குற்றம்சாட்டினர்.
பல தலைமுறைகளாக வாழும் மக்களை ஆக்கிரமிப்பாளர்கள் என குறிப்பிடுவது நியாயமல்ல என போராட்டக்காரர்கள் கூறினர். நீதிமன்றம் நியமித்த மத்திய அதிகாரக் குழு கிராமங்களில் நேரில் ஆய்வு செய்யாமல் ஹோட்டலில் கூட்டம் நடத்தி சென்றதாகவும் விமர்சனம் முன்வைக்கப்பட்டது.
மார்க்சிஸ்ட் கம்யூனிஸ்ட் கட்சியின் மாநில செயலர் சண்முகம், இதுகுறித்து முதல்வர் மு.க. ஸ்டாலினை சந்தித்து மனு அளித்ததாக தெரிவித்தார். அமைச்சர் நிர்மல் குமார் சீராய்வு மனு தாக்கல் செய்யப்படும்; அதுவரை மக்களை அகற்ற மாட்டோம் என கூறியதாகவும் அவர் குறிப்பிட்டார். தேனி திமுக எம்பி தங்கதமிழ்செல்வன், வெளியேற்ற நடவடிக்கை மேற்கொண்டால் எம்பி பதவியை ராஜினாமா செய்து போராட்டத்தில் பங்கேற்பேன் என தெரிவித்தார்.
