சென்னை: தமிழக நெடுஞ்சாலைத் துறையின் கீழ் முக்கிய சாலைகள் மற்றும் பாலப் பணிகளுக்காக டெண்டர் எடுத்த ஒப்பந்ததாரர்களுக்கு, பணிகள் முடிந்த பின்னரும் தொகை விடுவிப்பில் தாமதம் ஏற்படுவதாக புகார்கள் எழுந்துள்ளன.
மாநிலம் முழுவதும் நெடுஞ்சாலைத் துறையின் கட்டுமானம் மற்றும் பராமரிப்பு கோட்ட அலுவலகங்கள் 68 இடங்களில் செயல்படுகின்றன. முந்தைய ஆட்சிக் காலத்தில் சுமார் ரூ.25,000 கோடி மதிப்பீட்டில் பல்வேறு சாலைத் திட்டங்கள் மேற்கொள்ளப்பட்டதாக கூறப்படுகிறது.
அந்த பணிகளில் சுமார் 80% தற்போது நிறைவடைந்துள்ள நிலையில், மீதமுள்ளவை பல்வேறு கட்டங்களில் நடைபெற்று வருகின்றன. இருப்பினும், முந்தைய ஆட்சியில் டெண்டர் பெற்ற ஒப்பந்ததாரர்களுக்கு நிதி விடுவிப்பில் தாமதம் ஏற்பட்டு நெருக்கடி உருவாகிறது என அவர்கள் குற்றம்சாட்டுகின்றனர்.
ஒப்பந்ததாரர்கள் கூறுவதன்படி, முன்பு பணிகள் முடிந்ததும் 15 முதல் 30 நாட்களுக்குள் தொகை விடுவிக்கப்பட்டது. தற்போது சாலை மற்றும் மேம்பாலப் பணிகளை முடித்து தேவையான ஆவணங்களை சமர்ப்பித்த பிறகும், பணம் காலதாமதமாக விடுவிக்கப்படுவதாக அவர்கள் தெரிவிக்கின்றனர்.
இதனால் அடுத்தடுத்த பணிகளை தொடர்வதும், புதிய பணிகளை எடுப்பதும் தாமதமாகிறது என அவர்கள் கூறினர். அரசு நிர்வாகத்தில் வெளிப்படைத்தன்மையை வரவேற்கும் அதே நேரத்தில், முந்தைய ஆட்சியில் டெண்டர் எடுத்ததையே காரணமாகக் காட்டி திட்டத் தொகை விடுவிப்பை தாமதிக்கக் கூடாது என்றும் அவர்கள் வலியுறுத்தினர்.
