சென்னை: அண்ணாமலை தலைமையிலான ‘வீ தி லீடர்ஸ்’ அமைப்பில் உறுப்பினர் எண்ணிக்கையை உயர்த்தும் நோக்கில் ‘மிஸ்டு கால்’ இயக்கத்தை செயல்படுத்த திட்டமிடப்பட்டுள்ளதாக அமைப்பின் வட்டாரங்களில் தகவல் வெளியாகியுள்ளது.
தமிழக பா.ஜ.க. முன்னாள் தலைவர் அண்ணாமலை, கட்சியிலிருந்து விலகி ‘வீ தி லீடர்ஸ்’ என்ற அமைப்பை தொடங்கி நடத்தி வருகிறார். அமைப்பு சார்பில் கடந்த ஜூலை மாதம் முழுவதும் போதைக்கு எதிரான விழிப்புணர்வு நிகழ்ச்சிகள் நடத்தப்பட்டதாகவும், இந்த மாதம் சுற்றுச்சூழல் விழிப்புணர்வு நிகழ்ச்சிகள் நடைபெற்று வருவதாகவும் கூறப்படுகிறது.
அமைப்பின் மூத்த உறுப்பினர்கள் கூறுகையில், இதுவரை சுமார் 19.47 லட்சம் பேர் உறுப்பினர்களாக இணைந்துள்ளதாக தெரிவித்தனர். குறைந்தது 50 லட்சம் உறுப்பினர்கள் சேர்ந்த பின்னரே கட்சி தொடங்குவது என்ற நிலைப்பாட்டில் அண்ணாமலை இருப்பதாகவும் அவர்கள் கூறினர்.
ஆனால், கிராமப்புறத்தில் அவரை ஆதரிக்க விரும்புபவர்கள் மற்றும் இணையதள நடைமுறைகள் தெரியாதவர்கள் உறுப்பினராக சேர முடியாமல் இருப்பதாகவும், அவர்களை எளிதில் இணைக்க ‘மிஸ்டு கால்’ திட்டம் உதவும் எனவும் தெரிவிக்கப்பட்டது.
முன்னர் சில கட்சிகள் மேற்கொண்ட ‘மிஸ்டு கால்’ இயக்கங்களைப் போல உடனடியாக உறுப்பினராக பதிவு செய்யாமல், மிஸ்டு கால் கொடுப்பவர்களை தொடர்பு கொண்டு விவரங்களை சேகரித்த பின் உறுப்பினர்களாக சேர்க்க திட்டமிடப்பட்டுள்ளதாக கூறப்படுகிறது. இதற்கான அறிவிப்பு விரைவில் வெளியாகும் எனவும் அந்த வட்டாரங்கள் தெரிவித்தன.
