தமிழகத்தில் தி.மு.க. மற்றும் காங்கிரஸ் இடையிலான உறவில் புதிய பதற்றம் உருவாகியுள்ளது. லோக்சபா எதிர்க்கட்சி தலைவர் ராகுல் காந்தி ஸ்டாலின் மீது கோபமாக உள்ளதாக கூறப்படும் நிலையில், தமிழக காங்கிரஸ் தரப்பினர் ஸ்டாலினை ‘எட்டப்பன்’ என மறைமுகமாக விமர்சிக்கத் தொடங்கியதாக தெரிவிக்கப்படுகிறது.
இந்த மோதல், தொகுதி மறுவரையறை விவகாரத்தின் பின்னணியிலும் தீவிரமடைந்துள்ளது. முதல்வர் விஜய் தலைமையில் நடைபெற்ற அனைத்து கட்சி எம்.பி.க்கள் கூட்டத்தில் காங்கிரஸ், வி.சி.க., இரு கம்யூனிஸ்ட் கட்சிகள், ம.தி.மு.க., முஸ்லிம் லீக் ஆகிய கட்சிகளின் எம்.பி.க்கள் பங்கேற்றனர். தி.மு.க. மற்றும் அ.தி.மு.க. எம்.பி.க்கள் கூட்டத்தை புறக்கணித்தனர்.
இதுகுறித்து தி.மு.க. துணைப் பொதுச்செயலர் கனிமொழி, காவிரி விவகாரத்தை திசைதிருப்பி காங்கிரசை காப்பாற்றவே இந்த கூட்டம் நடத்தப்பட்டதாக குற்றம்சாட்டினார். மேலும் த.வெ.க. அரசை பின்னால் இருந்து இயக்குவது யார், தேர்தலுக்குப் பின் முதுகில் குத்திவிட்டு ஓடியவர்கள் யார் என்பது மக்களுக்கு தெரியும் எனவும் கடுமையாக விமர்சித்தார்.
இதற்கிடையில், ராகுல் காந்தி காங்கிரஸ் ஆளும் மாநிலங்களில் தொகுதி மறுவரையறை விவகாரத்தை கவனிக்கவில்லை என்றும், பிரதமர் மோடியை அடிக்கடி சந்திப்பதாக கூறப்படும் ‘இண்டி’ கூட்டணி மூத்த தலைவர் சரத்பவாரை விமர்சிக்காமல் ஸ்டாலினை மட்டும் வன்மத்துடன் எதிர்க்கிறார் என்றும் தி.மு.க. தரப்பு குற்றம்சாட்டி வருகிறது.
இதற்கு பதிலாக, காங்கிரஸ் ‘கூட்டணி அரசியலின் எட்டப்பன் யார்’ என்ற தலைப்பில் வெளியிட்ட பதிவில், 2004–2014 காலத்தில் மத்திய அமைச்சர் பதவிகளை அனுபவித்த பின் ஆட்சி முடியும் நேரத்தில் கூட்டணியை விட்டு வெளியேறியது யார், 2006–2011 காலத்தில் காங்கிரஸ் ஆதரவுடன் ஆட்சி நடத்தி 2014ல் கூட்டணியை உதறி 2016ல் மீண்டும் இணைந்தது யார், மேலும் 2026 சட்டசபை தேர்தலில் காங்கிரஸுடன் கூட்டணி வைத்துக்கொண்டே காங்கிரசுக்கு எதிரான அரவிந்த் கெஜ்ரிவாலை பிரசாரத்துக்கு அழைத்தது யார் என கேள்விகளை முன்வைத்தது. இதற்கு தி.மு.க. நிர்வாகிகள், சோனியா காந்தி மற்றும் ராகுல் காந்திக்கு தி.மு.க. தலைவர்கள் அளித்த ஆதரவை நினைவூட்டி, அமைச்சர் பதவிக்காக பக்கம் மாற முடிவு செய்தவர் யார் என்பதை மக்கள் அறிவார்கள் என பதிலளித்தனர்.
