சென்னை: பல மாவட்டங்களில் உள்ள சிப்காட் தொழிற்பேட்டைகள் போதிய அடிப்படை வசதியின்றி வளர்ச்சி பெறாமல் உள்ளதாக தொழில் துறை அமைச்சர் கீர்த்தனா சட்டசபையில் தெரிவித்தார். சில இடங்களில் அவை “பொட்டல் காடு” போலவே இருப்பதாகவும் அவர் குறிப்பிட்டார்.
முன்னாள் அமைச்சர் கே.என். நேருவின் கேள்விக்கு பதிலளித்த அவர், மாவட்ட வாரியாக சிப்காட் வளாகங்களை ஆய்வு செய்து வருவதாக கூறினார். முதலீட்டாளர்களுடன் நடந்த ஆய்வுகளில் தண்ணீர் வசதி, சாலை வசதி, தெருவிளக்குகள் போன்ற கோரிக்கைகள் தொடர்ந்து முன்வைக்கப்பட்டதாகவும் தெரிவித்தார்.
சாலை வசதிகள் செய்து கொடுக்கப்பட்டுள்ளன என்றும், தெருவிளக்குகள் அமைக்க ஒப்புதல் வழங்கப்பட்டுள்ளதாகவும் அமைச்சர் கூறினார். சில இடங்களில் சிசிடிவி கேமராவும் துணை மின்நிலையமும் இல்லாததால், மின்வசதி இல்லாமல் தொழில் தொடங்குவது எப்படி என்று முதலீட்டாளர்கள் கேள்வி எழுப்பியதாகவும் அவர் சொன்னார்.
மணப்பாறை சிப்காட் வளாகத்தில் பல குறைகள் இருப்பதாக சுட்டிக்காட்டிய அமைச்சர், தொழிற்சாலைகளின் எதிர்கால மின்தேவையை கருத்தில் கொண்டு 110 கிலோவோல்ட் துணை மின்நிலையம் அமைக்க நிலம் கண்டறியப்பட்டு, அதற்கான தானப்பத்திரமும் செய்யப்பட்டுள்ளதாக தெரிவித்தார்.
மேலும் பல இடங்களில் நிலம் வாங்கி ஒதுக்கி வைத்திருந்தாலும் தொழில்கள் வராத நிலை இருப்பதாக கூறிய அவர், அந்த நிலைமையை மாற்ற ஆய்வு செய்து ஒப்பந்தம் விடுத்து, முதல்வர் மூலமாக பணிகள் மேற்கொள்ளப்படுவதாகவும் தெரிவித்தார்.
