தமிழக சட்டசபையில் 110வது விதியின் கீழ், நெல் மற்றும் கரும்பு பயிரிடும் விவசாயிகளுக்கான ஊக்கத்தொகையை உயர்த்தி வழங்க அரசு முடிவு செய்துள்ளதாக முதல்வர் விஜய் அறிவித்தார்.
விவசாயிகள் பயிரிடுதல், அறுவடை, விற்பனை ஆகிய அனைத்திற்கும் உடல் உழைப்பு, பொருள் செலவு, நேரம் என அனைத்தையும் செலவிடுகின்றனர் என்று அவர் குறிப்பிட்டார். மாநிலத்தின் நிதிநிலைமை தற்போது சீராக இல்லாவிட்டாலும், விவசாயிகளுக்கான ஊக்கத்தொகையை அதிகரிக்க தீர்மானித்துள்ளதாக தெரிவித்தார்.
நெல் கொள்முதலுக்கான குறைந்தபட்ச ஆதரவு விலைக்கு மேலாக, சன்னரக நெல்லுக்கு ரூ.2,750 ஊக்கத்தொகை வழங்கப்படும் என்று அறிவித்தார். ஓராண்டில் நெல்லுக்கான ஊக்கத்தொகையை ரூ.156க்கும் மேல் உயர்த்துவது வரலாற்றில் முதல்முறை எனவும் அவர் கூறினார்.
மேலும் 2025–26 கரும்பு அரவைப் பருவத்தில், சர்க்கரை ஆலைகளில் பதிவு செய்து கரும்பு வழங்கும் விவசாயிகளுக்கு மத்திய அரசு மெட்ரிக் டன் ஒன்றுக்கு ரூ.3,290.50 நிர்ணயித்துள்ளதாக தெரிவித்தார். இதற்கு மேலாக தமிழக அரசு டன் ஒன்றுக்கு ரூ.709.50 சிறப்பு ஊக்கத்தொகை வழங்குவதால், விவசாயிகளுக்கு டன் ஒன்றுக்கு ரூ.4,000 என்ற அளவில் கரும்பு விலை கிடைக்கும் என்றார்.
விவசாயம் சிறக்கவும், ஊரக வாழ்வாதாரம் மேம்படவும் அரசு தொடர்ந்து விவசாயிகளுடன் தோளோடு தோள் நின்று ஆதரவு அளிக்கும் என்றும் முதல்வர் விஜய் கூறினார்.
