புதுடில்லி: டாடா சன்ஸ் குழுமத் தலைவர் என். சந்திரசேகரன் திடீரென தனது பதவியை ராஜினாமா செய்துள்ளார். ஆகஸ்ட் 18-ம் தேதி நடைபெறவுள்ள நிறுவனத்தின் பொதுக்குழு கூட்டத்திற்கு முன்னதாக இந்த முடிவு எடுக்கப்பட்டதாக தெரிவிக்கப்பட்டுள்ளது.
அறிக்கையின் படி, டாடா டிரஸ்ட் தலைவர் நோயல் டாடாவுடன் ஏற்பட்ட நிர்வாக ரீதியான கருத்து வேறுபாடுகளே ராஜினாமாவுக்குக் காரணம். 63 வயதான சந்திரசேகரனின் பதவிக்காலம் பிப்ரவரி 2027 வரை இருந்த நிலையில் அவர் விலகியுள்ளார்.
இந்த அறிவிப்பைத் தொடர்ந்து சந்தையில் உடனடி தாக்கம் ஏற்பட்டது; டாடா கன்சல்டன்சி சர்வீசஸ் (டிசிஎஸ்) நிறுவன பங்குகள் கிட்டத்தட்ட 4% வரை சரிந்தன.
டிசிஎஸ், டாடா மோட்டார்ஸ், டாடா கன்ஸ்யூமர் ப்ராடக்ட்ஸ் உள்ளிட்ட பல டாடா குழும நிறுவனங்களிலும் அவர் தலைவராக இருப்பதால், அவரது விலகல் குழுமத்திற்குள் குறிப்பிடத்தக்க தாக்கங்களை ஏற்படுத்தக்கூடும் என கூறப்படுகிறது.
2017-ல் டாடா சன்ஸ் பொறுப்பை ஏற்றதிலிருந்து குழும வணிகங்களை மேற்பார்வையிடுவதில் அவர் முக்கிய பங்காற்றியுள்ளார். கோவை சி.ஐ.டி. கல்லூரி மற்றும் திருச்சி ஆர்.இ.சி. கல்லூரியில் கல்வி பயின்ற அவர், டிசிஎஸ் நிறுவனத்தை முன்னிலைக்கு கொண்டு வருவதிலும் முக்கிய பங்காற்றியதாக குறிப்பிடப்பட்டுள்ளது.
