சென்னை: மத்திய அரசு கொண்டு வரும் தொகுதி மறுவரையறை தொடர்பான சட்ட மசோதாவை திரும்பப்பெற வலியுறுத்தி, தமிழக சட்டசபையில் நேற்று தீர்மானம் நிறைவேற்றப்பட்டது. தீர்மானத்தை முன்மொழிந்து பேசிய முதல்வர் விஜய், பெண்கள் பிரதிநிதித்துவம் மற்றும் மாநிலங்களின் உரிமைகள் பாதிக்கப்படக் கூடாது என வலியுறுத்தினார்.
கல்வி, அறிவியல், நிர்வாகம், நீதி, தொழில்நுட்பம் உள்ளிட்ட பல துறைகளில் தமிழக பெண்களின் பங்களிப்பு குறிப்பிடத்தக்கது என அவர் கூறினார். அரசியலிலும் பெண்கள் முன்னேற உரிய இடஒதுக்கீடு வழங்கப்பட வேண்டும்; இதை சலுகையாக பார்க்காமல் சமூக நீதியின் அடிப்படையில் அணுக வேண்டும் என்றும் தெரிவித்தார்.
தமிழகத்தில் கடந்த சட்டசபையில் 12 பெண் எம்.எல்.ஏ.க்கள் இருந்த நிலையில், தற்போது 23 பேர் உள்ளதாக முதல்வர் குறிப்பிட்டார்; இருப்பினும் சதவீத அளவில் உயர்வு போதுமானதாக இல்லை என்றார். மேலும், தற்போது தமிழகத்தில் நான்கு பெண் அமைச்சர்கள் இருப்பதாகவும், உள்ளாட்சி அமைப்புகளில் 50% இடஒதுக்கீடு மூலம் பெண்களின் தலைமைத் திறன் நிரூபிக்கப்பட்டுள்ளதாகவும் கூறினார்.
மத்திய அரசு 2023ல் கொண்டு வந்த பெண்கள் இடஒதுக்கீடு சட்டம் 2026 ஏப்ரல் முதல் அமலுக்கு வரும் என அறிவிக்கப்பட்டாலும், மக்கள் தொகை கணக்கெடுப்பு மற்றும் அதனைத் தொடர்ந்து நடைபெறும் தொகுதி மறுவரையறைக்கு பிறகே முழுமையாக நடைமுறைக்கு வரும் என கூறப்பட்டிருப்பது காலதாமதத்தை உருவாக்கும் என அவர் சுட்டிக்காட்டினார். லோக்சபா மற்றும் சட்டசபைகளில் 33% இடஒதுக்கீட்டை உறுதிப்படுத்தி, 2029 லோக்சபா தேர்தலிலேயே அதை நடைமுறைப்படுத்த வேண்டும் என்றும் வலியுறுத்தினார்.
மேலும், 2026 மக்கள் தொகை கணக்கெடுப்புக்குப் பின் நடைபெறும் மறுவரையறை காரணமாக தென் மாநிலங்களின் எம்.பி. எண்ணிக்கை குறையக்கூடும் என முதல்வர் எச்சரித்தார்; மாநிலங்களுக்கு கூடுதல் தொகுதிகள் வழங்கினாலும் இந்த பாதிப்பு ஏற்படலாம் என்றார். மக்கள் தொகையை கட்டுப்படுத்திய மாநிலங்களின் பொருளாதார முன்னேற்றம் பாதிக்கப்படக் கூடாது என்பதால், தற்போதுள்ள 543 எம்.பி.க்கள் என்ற எண்ணிக்கையை நிரந்தரமாகத் தொடர வேண்டும் என்றும் அவர் கூறினார்.
