நடிகர் விக்ரம் லார் கிப்பன் எனப்படும் அரிய வகை குரங்கு குட்டியுடன் சமூக வலைத்தளத்தில் வெளியிட்ட வீடியோ சர்ச்சையை ஏற்படுத்தி, சட்டவிரோத வன உயிரின வர்த்தக சந்தேகத்தை வெளிச்சத்துக்கு கொண்டு வந்துள்ளது. விசாரணையில் அந்த குட்டி ஈரோடு பெருந்துறையில் உள்ள தனியார் பண்ணையிலிருந்து பெறப்பட்டதாக தெரிய வந்தது.
இதையடுத்து அந்த பண்ணையில் உள்ள விலங்குகளைப் பறிமுதல் செய்ய வனத்துறை அதிகாரிகள் விசாரணையைத் தொடங்கியுள்ளனர். மேலும், அதே பண்ணையில் இருந்த இன்னொரு லார் கிப்பன் குட்டி இறந்தது குறித்து வனத்துறைக்கு தகவல் அளிக்கப்படவில்லை என்பதும் கண்டறியப்பட்டதாக அதிகாரிகள் தெரிவித்தனர்.
அதிகாரிகள் கூறுகையில், இந்த ஆண்டு ஜூன் மாதம் மணிப்பூரிலிருந்து பெறப்பட்டதாக கூறப்படும் லார் கிப்பன்களை வளர்ப்பதற்கான ஆவணங்களை பண்ணை உரிமையாளர் கேசவநாதன் சமர்ப்பிக்கவில்லை. விளக்கம் கோரி நோட்டீஸ் அனுப்பி, சான்றிதழ்களை வழங்க ஒரு நாள் அவகாசம் அளித்தபோதும், முரண்பாடான பதில்களே வந்ததாக தெரிவித்தனர்.
முதற்கட்ட விசாரணையில் இவை கடத்தப்பட்ட விலங்குகள் போலத் தோன்றுவதாகவும், ஓரிரு நாட்களில் கிப்பன் குரங்குகளைப் பறிமுதல் செய்ய நடவடிக்கை எடுக்கப்படும் என்றும் அதிகாரிகள் கூறினர். ஆய்வின்போது லார் கிப்பன் மட்டுமல்லாமல் பல அரிய வகை பறவைகள், பாலூட்டிகள், ஊர்வனங்களும் வளர்க்கப்பட்டிருந்தது கண்டுபிடிக்கப்பட்டது; பண்ணை பதிவேடுகள் மற்றும் இணையத்தில் பதிவிடப்பட்ட தரவுகளுக்கிடையே வேறுபாடுகளும் இருப்பதாக தெரிவித்தனர்.
அரிய உயிரினங்களுக்கு அனுமதி சான்றிதழ்கள் நீண்ட காலமாக நிலுவையில் இருப்பதும், விலங்குகள் இடமாற்றங்கள் தொடர்ச்சியாக நடந்திருக்க வாய்ப்பும் உள்ளதால் தீவிர விசாரணை தேவை என இயற்கை ஆர்வலர்கள் வலியுறுத்தினர். இதற்கிடையில், உரிமையாளரின் சம்மந்தி ரங்கநாதன் தரப்பு ‘ஈரோட்டிலிருந்து விற்பனைக்காக கொண்டுவரப்பட்ட குரங்குகள்’ என கூறியதாகவும், அவர் திமுக தலைவர் ஸ்டாலின் குடும்பத்துக்கு நெருங்கிய உறவினர் என குறிப்பிடப்படுவதால், பிரபலங்கள் தொடர்புடையதால் நடவடிக்கை தாமதமாகிறதா என்ற சந்தேகமும் எழுந்துள்ளது.
