அண்ணாமலை தலைமையிலான ‘வீ தி லீடர்ஸ்’ அமைப்பில் சேர்ந்திருந்த சிலர், தற்போது மீண்டும் பா.ஜ.க.வில் இணைவதைத் தொடங்கியுள்ளதாக தகவல்கள் தெரிவிக்கின்றன.
தமிழக பா.ஜ.க. தலைவராக இருந்த காலத்தில், அண்ணாமலை மேற்கொண்ட அதிரடி அரசியல் செயல்பாடுகள் மூலம் கட்சிக்குள் மட்டுமல்லாமல் கட்சிக்கு வெளியிலும் ஆதரவாளர்களை உருவாக்கியிருந்தார். சட்டசபைத் தேர்தலுக்குப் பிறகு கட்சிக்குள் ஏற்பட்ட மனக்கசப்பைத் தொடர்ந்து அவர் பா.ஜ.க.வை விட்டு விலகி, ‘வீ தி லீடர்ஸ்’ என்ற அமைப்பை தொடங்கினார்.
அவர்மீது இருந்த நம்பிக்கையால் பல நிர்வாகிகள் பா.ஜ.க.வை விட்டு வெளியேறி அந்த அமைப்பில் இணைந்தனர். ஆனால், தற்போது அண்ணாமலை முன்பு இருந்த அதிரடி அரசியல் பாணியிலிருந்து விலகி அமைதியான முறையில் செயல்படுவதாகவும், இதனால் சிலருக்கு அதிருப்தி ஏற்பட்டுள்ளதாகவும் கூறப்படுகிறது.
மேலும், தன்னுடன் வந்தவர்களுக்கு எந்தப் பொறுப்புகளும் வழங்கப்படவில்லை என்ற குற்றச்சாட்டும் அதிருப்தியை அதிகரித்ததாக தகவல்கள் தெரிவிக்கின்றன. இதன் விளைவாக சிலர் மீண்டும் பா.ஜ.க.வுக்கு திரும்பத் தொடங்கியுள்ளனர்.
அந்த வரிசையில், திருநெல்வேலியில் முன்னாள் மாவட்ட நிர்வாகிகள் வெங்கடேஷ் (பா.ஜ.க. ஓ.பி.சி. அணி முன்னாள் செயலர்), ‘புரோட்டாகால்’ பிரிவு முன்னாள் மாவட்ட செயலர்கள் பேச்சிமுத்து, கோவிந்தராஜன், முன்னாள் கிளைத் தலைவர் ராஜி உள்ளிட்டோர், தமிழக பா.ஜ.க. தலைவர் நயினார் நாகேந்திரன் முன்னிலையில் நேற்று மீண்டும் பா.ஜ.க.வில் இணைந்தனர்.
