புதுடில்லி: பிரதமர் நரேந்திர மோடியின் சுதந்திர தின உரை, இந்தியா வளர்ச்சியடைந்த நாடாக மாறும் பயணத்தின் முக்கிய மைல் கல் என உள்துறை அமைச்சர் அமித் ஷா பாராட்டினார்.
தன் பதிவில், போதைப் பொருள் இல்லாத இந்தியா, பாதுகாப்பான இந்தியா, ‘தேசமே முதன்மை’ என்ற உணர்வுடன் கூடிய வளர்ந்த இந்தியாவை உருவாக்குவதற்கான விரிவான செயல்திட்டத்தை பிரதமர் முன்வைத்ததாக ஷா குறிப்பிட்டார். சுதேசி மற்றும் தற்சார்பு குறித்த உறுதியும் உரையில் வெளிப்பட்டதாக அவர் கூறினார்.
கடந்த 12 ஆண்டுகளில் செமி கண்டக்டர்கள், கனிமங்கள், எரிசக்தி, ரயில்வே உள்ளிட்ட துறைகளில் ஏற்பட்ட முன்னேற்றங்களை பிரதமர் சுட்டிக்காட்டியதாகவும், அனைத்து துறைகளிலும் தன்னிறைவை நோக்கி மாற்றம் செய்ய வேண்டியதைக் கூறி ‘ஏழு சக்திகள்’ என்ற மந்திரத்தை (ஏழு முக்கிய அறிவிப்புகள்) வழங்கியதாகவும் ஷா தெரிவித்தார்.
மேலும், சுதந்திரம் பெற்ற 80 ஆண்டுகளில் செங்கோட்டைக் கொத்தளத்தில் முதல் முறையாக ‘வந்தே மாதரம்’ பாடப்பட்டது வரலாற்றுத் தருணம் என்றும், அது தன்னை மெய்சிலிர்க்க வைத்ததாகவும் ஷா கூறினார்.
இதனிடையே, பாதுகாப்புத்துறை அமைச்சர் ராஜ்நாத் சிங், பிரதமரின் உரை “அற்புதமானது, சிறப்பானது” என பாராட்டி, ‘விக்சித் பாரத்’ நோக்கில் ஆத்மநிர்பர்தா, மேக் இன் இந்தியா, எரிசக்தி பாதுகாப்பு, அதிநவீன தொழில்நுட்பம் மற்றும் செயற்கை நுண்ணறிவு மூலம் இளைஞர்களுக்கு அதிகாரமளித்தல் ஆகியவற்றில் பிரதமரின் தீர்மானம் தெளிவாக வெளிப்பட்டதாக தெரிவித்தார்.
