தொகுதி மறுவரையறை நடைமுறைக்கு வந்தால் தமிழகத்தின் லோக்சபா பிரதிநிதித்துவம் கணிசமாக அதிகரிக்கலாம் என்று ஹிந்து மக்கள் கட்சி தலைவர் அர்ஜுன் சம்பத் தெரிவித்தார்.
சென்னையில் அவர் பேசுகையில், தற்போது உள்ள 39 நாடாளுமன்ற தொகுதிகள் மறுவரையறை மூலம் 59 ஆக உயர வாய்ப்பு இருப்பதாகவும், இதனால் தமிழகத்திற்கு கூடுதல் பிரதிநிதித்துவம் கிடைக்கும் என்றும் கூறினார்.
மேலும், தொகுதி மறுவரையறை குறித்து சில அரசியல் கட்சிகள் தவறான கருத்துகளை பரப்புவதாக அவர் குற்றம்சாட்டினார். காலப்போக்கில் அதன் நன்மைகளை அனைத்து கட்சிகளும் உணர்ந்து ஆதரிக்கும் நிலை உருவாகும் என்றும் தெரிவித்தார்.
அதே உரையில், பிரதமர் நரேந்திர மோடி தலைமையில் நாடு பல துறைகளில் முன்னேறி வருவதாக கூறிய அவர், எத்தனால் கலந்த எரிபொருள் பயன்பாடு, சூரிய ஆற்றல் திட்டங்கள் மற்றும் ராணுவ வளர்ச்சி ஆகியவற்றை எடுத்துக்காட்டினார். 2047-ல் சுதந்திரத்தின் நூற்றாண்டை கொண்டாடும் போது இந்தியா வல்லரசாக மாறும்; அதற்காக அனைவரும் அர்ப்பணிப்புடன் உழைக்க வேண்டும் என்றும் அவர் வலியுறுத்தினார்.
