சுதந்திர தின விழாவில் வழங்கப்பட்ட விருதுகள்

சென்னையில் நடைபெற்ற சுதந்திர தின கொண்டாட்டங்களில் தமிழகத்தின் வளர்ச்சி, பொதுச் சேவை மற்றும் சமூக நலப் பணிகளில் சிறந்த பங்களிப்பு அளித்தவர்களை கௌரவிக்கும் வகையில் முதல்வர் விஜய் பல்வேறு மாநில விருதுகளை வழங்கினார்.

தகைசால் தமிழர் விருது

தமிழகத்திற்கும் தமிழின வளர்ச்சிக்கும் பங்காற்றியவர்களை கௌரவிக்கும் ‘தகைசால் தமிழர்’ விருது, தமிழக காங்கிரஸ் முன்னாள் தலைவர் கிருஷ்ணசாமிக்கு வழங்கப்பட்டது. அவருக்கு ரூ.10 லட்சம் காசோலை மற்றும் பாராட்டு சான்றிதழும் வழங்கப்பட்டன.

டாக்டர் அப்துல்கலாம் விருது, கல்பனா சாவ்லா விருது

அறிவியல் வளர்ச்சி, மனிதநேயம், மாணவர் நலன் உள்ளிட்ட துறைகளில் சிறந்து விளங்குவோருக்கு சுதந்திர தினத்தன்று வழங்கப்படும் டாக்டர் அப்துல்கலாம் விருது, சர்க்கரை நோயியல் நிபுணர் டாக்டர் மோகனுக்கு அறிவிக்கப்பட்டது. மருத்துவப் பணிகளில் சிறப்பான பங்களிப்பு மற்றும் ஏழை, ஆதரவற்ற நோயாளிகளுக்கு இலவச சிகிச்சை வழங்கியதற்காக இந்த விருது வழங்கப்பட்டதாக தெரிவிக்கப்பட்டது. டாக்டர் மோகனுக்கு பதிலாக அவரது மகள் அஞ்சனாவிடம் முதல்வர் விருதை வழங்கினார்.

துணிவு மற்றும் சாகச செயல்களில் ஈடுபடும் பெண்களுக்கு வழங்கப்படும் கல்பனா சாவ்லா விருது, கோவை மாவட்டத்தைச் சேர்ந்த நவ்ஷீன் பானு சந்திற்கு வழங்கப்பட்டது. அவர் 2024 முதல் 2026 வரை தொடர்ந்து மூன்று ஆண்டுகள் ‘டென்சிங் ஹிலாரி எவரெஸ்ட் மாரத்தான்’ போட்டியை வெற்றிகரமாக நிறைவு செய்து ‘ஹாட்ரிக்’ சாதனை படைத்துள்ளார்.

முதல்வரின் நல்லாளுமை விருதுகள் மற்றும் மாற்றுத்திறனாளிகள் நலக் கௌரவங்கள்

முதல்வரின் நல்லாளுமை விருதுகளில், நீலகிரி மாவட்டத்தில் குழந்தை பருவ வளர்ச்சி குறைவை கண்டறிந்து ஒருங்கிணைந்த அணுகுமுறையில் நடவடிக்கை எடுத்ததற்காக கலெக்டர் லட்சுமி பவ்யாவுக்கு விருது அறிவிக்கப்பட்டது. இந்த விருது சென்னையில் நடைபெறும் கலெக்டர்கள் மற்றும் எஸ்.பி.க்கள் மாநாட்டில் வழங்கப்பட உள்ளது.

மேலும், நவீன பராமரிப்பு, சுற்றுச்சூழலுக்கு உகந்த நடைமுறைகள் மற்றும் அறிவியல் பூர்வமான கழிவு மேலாண்மை மூலம் மெட்ரோ நிலையங்கள், ரயில்களை சுத்தமாக பராமரித்ததற்காக மெட்ரோ ரயில் நிறுவனத்தின் பொது மேலாளர் சதீஷ் பிரபுவுக்கு நல்லாளுமை விருது வழங்கப்பட்டது. எலும்பியல் துறை நிதியை மறுசுழற்சி செய்து அரசுக்கு கூடுதல் செலவில்லாமல் எடை குறைந்த செயற்கை உறுப்புகளை தயாரித்து வழங்கியதற்காக கோவை அரசு மருத்துவக் கல்லூரி எலும்பியல் மற்றும் விபத்து காய சிகிச்சை துறை மருத்துவர் கீதாஞ்சலிக்கும் விருது வழங்கப்பட்டது.

மாற்றுத்திறனாளிகள் நலப் பிரிவில், சென்னை அரசு புனர்வாழ்வு மையத்தில் இயக்குநர் மற்றும் உடற்செயல்–மறுவாழ்வு துறைத் தலைவராக பணியாற்றும் மருத்துவர் திருநாவுக்கரசுக்கு, 34 ஆண்டுகளுக்கும் மேலான சேவையை பாராட்டி விருது வழங்கப்பட்டது. விழுப்புரம் மாவட்டம் கோணமங்கலம் கிராமத்தில் இயங்கும் ‘சிருஷ்டி பவுண்டேஷன்’ அமைப்புக்கு 625க்கும் மேற்பட்ட மாற்றுத்திறனாளிகளுக்கு கல்வி மற்றும் திறன் மேம்பாட்டு பயிற்சி வழங்கியதற்காக சிறந்த நிறுவன விருது வழங்கப்பட்டது. மேலும், மாற்றுத்திறனாளிகள் உள்ளிட்ட பல்வேறு பாதிப்புக்குள்ளானவர்களின் நலனுக்காக பணியாற்றும் திருவண்ணாமலையைச் சேர்ந்த உலக மக்கள் சேவை மையத் தலைவர் மணிமாறனுக்கு சிறந்த பணியாளர் விருது வழங்கப்பட்டது. திருப்பூர் மாவட்டத்தில் இயங்கும் எஸ்.சி.எம். கார்மெண்ட்ஸ் நிறுவனத்தில் 212 மாற்றுத்திறனாளிகள் பணிபுரிவதை முன்னிட்டு, அதிக வேலைவாய்ப்பு அளித்த சிறந்த தனியார் நிறுவனத்திற்கான விருதும் அந்த நிறுவனத்திற்கு வழங்கப்பட்டது.