சென்னை: தமிழக வெற்றிக் கழக (தவெக) அரசின் அமைச்சர்கள் லஞ்சம் கேட்கும் வகையில் உள்ள ஆடியோ பதிவுகள் தன்னிடம் இருப்பதாக ‘வீ தி லீடர்ஸ்’ அமைப்பின் தலைவர் அண்ணாமலை தெரிவித்தார்.
சென்னை எழும்பூரில் நடைபெற்ற சுற்றுச்சூழல் விழிப்புணர்வு பேரணியில் பேசிய அவர், தமிழகத்துக்கான முடிவுகளை டில்லியிலிருந்தோ அல்லது சென்னையில் எங்கோ ஒரு வீட்டிலிருந்தோ தலைவர்கள் எடுக்கக் கூடாது என்றார். தாம் அரசியல் பேசுவதில்லை என சிலர் கூறினாலும், உலகத்தில் அரசியல் பேசுவது தான் எளிதான வேலை என்றும் குறிப்பிட்டார்.
தமிழகத்தில் மாற்றம் ஏற்பட்டுள்ளதாக கூறிய அண்ணாமலை, புதிய ஆட்சிக்கு குறைந்தது ஓராண்டாவது அவகாசம் வழங்க வேண்டும் என்றார். அதே நேரத்தில், ஆட்சியை கவிழ்க்க எம்.எல்.ஏ.க்களை “பிடிப்பது” போன்ற முயற்சிகள் நடக்கின்றன என்றும் குற்றம்சாட்டினார்.
முதல்வர் விஜய் ஊழலுக்கு எதிராக இருப்பது உண்மை என்றாலும், ஊழல் மீண்டும் தொடங்கியுள்ளதாக அவர் கூறினார். “2 அல்லது 3 சதவீதம் கொடு” என சில அமைச்சர்கள் கமிஷன் கேட்கும் ஆடியோ தன்னிடம் இருப்பதாகவும், பிரச்னை செய்யும் முன் அதை முதல்வரின் கவனத்துக்கு கொண்டு வருவதாகவும் தெரிவித்தார்.
மேலும், மத்திய அமைச்சர் அமித் ஷா தமக்கு அளித்ததாக கூறப்படும் ‘ஆபர்’ குறித்து பேசினார்; டில்லியில் இருந்து மூன்று ஆண்டுகள் பொறுப்பு எடுக்கச் சொன்னதாகவும், தாம் அதை மறுத்ததாகவும் கூறினார். கர்நாடக முதல்வர் சிவகுமார் மேகதாது அணை கட்ட முயல்வது குறித்து விமர்சித்த அவர், மாநில பட்ஜெட்டில் செலவுக் குறைப்பாக கூறப்பட்ட தொகையை கிராமப்புற வளர்ச்சி, அரசு பள்ளிகள் மற்றும் நீர்நிலைகள் சுத்தம் செய்வதற்கு ஒதுக்க வேண்டும் என்றும், தனிப்பட்ட தாக்குதல்களாக மாறும் அரசியல் இளைஞர்களுக்கு பிடிக்கவில்லை என்றும் தெரிவித்தார்.
