உலகக் கோப்பை ஹாக்கியில் இந்தியா இன்று ஆம்ஸ்டல்வீனில் பலம் வாய்ந்த இங்கிலாந்தை எதிர்கொள்கிறது. உலகக் கோப்பை அரங்கில் இங்கிலாந்தை 32 ஆண்டுகளுக்குப் பின் வீழ்த்தும் இலக்குடன் இந்திய அணி களமிறங்குகிறது.
பெல்ஜியத்தின் வேவ்ரே மற்றும் நெதர்லாந்தின் ஆம்ஸ்டல்வீன் நகரங்களில் 16வது உலகக் கோப்பை ஹாக்கி தொடர் (ஆண்கள், பெண்கள் பிரிவு) நடைபெற்று வருகிறது. ‘டி’ பிரிவில் உள்ள இந்தியா (உலக தரவரிசை 8) முதல் போட்டியில் வேல்ஸ் (15) அணியை எளிதாக வென்று தொடக்கத்தை சிறப்பாக அமைத்தது.
ஆனால் அந்த ஆட்டத்தில் வேகமான தொடக்கத்துக்குப் பிறகு ஆட்டத்தின் தீவிரம் குறைந்தது என்ற விமர்சனமும் எழுந்தது. அபிஷேக், சுக்ஜித் உள்ளிட்ட முன்கள வீரர்கள் வாய்ப்புகளை முழுமையாக முடிக்க முடியாமல் தவித்தனர்; தற்காப்பும் சோர்வாகத் தோன்றியது. முதல் போட்டியில் இரு கோல் அடித்த கேப்டன் ஹர்மன்பிரீத் சிங் மற்றும் ஒரு கோல் அடித்த சஞ்சய் நம்பிக்கை அளித்தாலும், ஹர்திக் சிங், அனுபவ மன்பிரீத் சிங், மந்தீப் சிங், கோல்கீப்பர் சூரஜ் கர்கேரா உள்ளிட்ட அனைவரும் ஒருங்கிணைந்த எழுச்சியுடன் விளையாட வேண்டிய கட்டாயம் உள்ளது.
இந்த மோதலுக்கு வரலாற்றுச் சுமையும் உள்ளது. உலகக் கோப்பையில் இந்தியா கடைசியாக 1994ல் சிட்னியில் நடந்த 5–6வது இடத்துக்கான போட்டியில் 1-0 என இங்கிலாந்தை வென்றது. அதன் பின்னர் 2002, 2006, 2010ல் தொடர்ந்து மூன்று முறை இங்கிலாந்து 3-2 என இந்தியாவை வீழ்த்தியது; 2014ல் 2-1 என வென்றது. 2023ல் இரு அணிகளின் மோதல் கோலின்றி டிராவாக முடிந்தது.
இங்கிலாந்து இந்த தொடரை பாகிஸ்தானை 4-1 என வென்று தொடங்கியுள்ளது. 2006 முதல் நடந்த ஐந்து உலகக் கோப்பைகளில் ‘டாப்-5’ இடத்தை பிடித்துள்ளதுடன், 2025-26 புரோ ஹாக்கி லீகில் 16 போட்டிகளில் இரண்டில் மட்டுமே தோற்று இரண்டாவது இடம் பெற்றுள்ளது; அதே தொடரில் இந்தியா 8வது இடம் பிடித்தது. இந்திய பயிற்சியாளர் கிரெய்க் புல்டன், உலகக் கோப்பையில் ஆட்டம் மேலும் கடுமையாக இருக்கும் எனக் கூறி, இங்கிலாந்தின் திட்டத்தை தகர்த்து வெற்றி பெற முயல்வோம் என்றார். ஒவ்வொரு பிரிவிலும் முதல் இரண்டு இடங்களைப் பெறும் அணிகள் மட்டுமே அடுத்த சுற்றுக்கு முன்னேறும் என்பதால், இந்தப் போட்டி இந்தியாவுக்கு முக்கியமானதாக உள்ளது.
