மதுரை அருகே உள்ள குட்லாடம்பட்டி அருவி சீரமைப்பு பணிகள், அடிக்கல் நாட்டியதிலிருந்து 250 நாட்கள் கடந்தும் தொடங்காததால் சுற்றுலாப் பயணிகளும் உள்ளூர் மக்களும் ஏமாற்றம் தெரிவித்துள்ளனர்.
மதுரையிலிருந்து சுமார் 30 கி.மீ. தொலைவில், வாடிப்பட்டி அருகே அமைந்துள்ள இந்த அருவியில் ஆண்டில் சுமார் எட்டு மாதங்கள் தண்ணீர் வரத்து இருக்கும். 2018-ல் கஜா புயலின்போது பாறைகள் உருண்டு மோதியதால் குளிக்கும் பகுதி, கைப்பிடி, நடைபாதை, உடைமாற்றும் அறை, கழிப்பறை உள்ளிட்ட வசதிகள் சேதமடைந்தன. இதையடுத்து வனத்துறை அருவியில் குளிப்பதற்கு தடை விதித்தது.
2024-ல் ரூ.3 கோடி நிதி ஒதுக்கப்பட்டு, 2025 டிசம்பர் 7-ல் அன்றைய முதல்வர் மு.க.ஸ்டாலின் அடிக்கல் நாட்டினார். ஆனால் இதுவரை டெண்டர் பணிகள்கூட தொடங்கவில்லை என்றும், வனத்துறை அதிகாரிகளை தொடர்பு கொள்ள முடியவில்லை என்றும் சுற்றுலா ஆர்வலர்கள் குற்றஞ்சாட்டுகின்றனர்.
சுற்றுலாத்துறை அதிகாரிகள் கூறுகையில், சீரமைப்புக்கான நிதியை சுற்றுலாத்துறை ஒதுக்கியிருந்தாலும், வளர்ச்சி பணிகள் வனத்துறை மூலமே நடைபெறும் என்றனர். தேர்தலுக்குப் பிறகு பணிகளை தொடங்க திட்டமிட்ட நிலையில், நிர்வாக காரணங்களால் தாமதம் ஏற்பட்டதாகவும், விரைவில் டெண்டர் தொடங்கப்படும் என்றும் தெரிவித்தனர்.
அருவி மீண்டும் திறக்கப்பட்டால் சுற்றுலா வருகை அதிகரித்து உள்ளூர்வாசிகளின் வாழ்வாதாரம் மேம்படும் என்பதால், பணிகளை மேலும் தாமதிக்காமல் முடிக்க வேண்டும் என்ற கோரிக்கை வலுத்துள்ளது.
