மாவட்டத்தின் ஊராட்சி, பேரூராட்சி மற்றும் புறநகர் பகுதிகளில் வெளிநபர்கள் நடமாட்டம் அதிகரித்துள்ளதாக உள்ளூர் மக்கள் தெரிவிக்கின்றனர். கிராமங்களுக்கு வந்து செல்லும் நபர்கள் குறித்து அறிந்து கொள்ளும் வகையில் முறையான வசதிகள் பல இடங்களில் இல்லை என்றும் கூறப்படுகிறது.
கடந்த சில நாட்களாக புறநகர் பகுதிகளில் திருட்டுச் சம்பவங்கள் மற்றும் திருட்டு முயற்சிகள் அதிகரித்துள்ளதாக தகவல் வெளியாகியுள்ளது. பல பகுதிகளில் கண்காணிப்பு கேமராக்கள் இல்லாததால், சம்பவங்களை ஆதாரங்களுடன் கண்டறிவதில் போலீசாருக்கு சிரமம் ஏற்படுகிறது எனவும் குறிப்பிடப்படுகிறது.
இதையடுத்து, உள்ளாட்சி அமைப்புகள் மற்றும் பெரிய நிறுவனங்கள் இணைந்து முக்கிய சாலைகள் மற்றும் மக்கள் கூடும் இடங்களில் சிசிடிவி கேமராக்களை அமைக்க நடவடிக்கை எடுக்க வேண்டும் என பல்வேறு அமைப்புகள், தன்னார்வலர்கள் மற்றும் பொதுமக்கள் கோரிக்கை விடுத்துள்ளனர். இதற்கான நிதி ஆதாரங்களை உரிய முறையில் ஏற்படுத்த வேண்டும் என்றும் வலியுறுத்தப்பட்டுள்ளது.
மேலும், புதிய வணிக நிறுவனங்கள் தொடங்குபவர்கள் மற்றும் வீடு கட்டுபவர்கள் கட்டுமானச் செலவிலேயே சிறு தொகையை ஒதுக்கி கேமரா அமைத்தால், தனிப்பட்ட சொத்துகளும் பாதுகாக்கப்படும்; அதே நேரத்தில் அந்தப் பகுதியின் பாதுகாப்பும் உறுதியாகும் என அவர்கள் கூறுகின்றனர்.
இந்த நடவடிக்கைகளை முன்னெடுக்க மாவட்ட எஸ்.பி. ஜெயக்குமார் மாவட்ட நிர்வாகத்துடன் ஆலோசித்து செயல்பட வேண்டும் எனவும் கோரிக்கை விடுக்கப்பட்டுள்ளது.
