தமிழக பா.ஜ. தலைவர் நயினார் நாகேந்திரன், தமிழக அமைச்சர்கள் ‘வாங்கும்’ விவரங்களை விரைவில் வெளியிட உள்ளதாக தெரிவித்தார். துாத்துக்குடியில் செய்தியாளர்களிடம் பேசியபோது அவர் இதை கூறினார்.
கர்நாடகாவில் தமிழர்கள் மூவர் சுட்டுக் கொல்லப்பட்ட சம்பவம் குறித்து அவர் பேசினார். இந்த விவகாரத்தில் கர்நாடக முதல்வருக்கு கடும் கண்டனங்கள் தெரிவிக்கப்பட வேண்டும் என்றும், எந்த மாநில மக்களாக இருந்தாலும் அவர்களின் உயிரை பறிக்க யாருக்கும் உரிமை இல்லை என்றும் கூறினார்.
தமிழகத்தில் புதிய அரசு பொறுப்பேற்று நிறைவடைந்த 100 நாட்களை மக்கள் வேதனையுடன் நினைப்பதாக அவர் விமர்சித்தார். அமைச்சர்கள் அனைவரும் தங்கள் ‘வேலை’யை தொடங்கி விட்டதாகவும், அதற்கான பொருள் அனைவருக்கும் தெரியும் என்றும் அவர் கூறினார்.
யார் யார், எங்கெல்லாம் ‘வாங்குகின்றனர்’ என்ற பட்டியல் தங்களிடம் இருப்பதாக நயினார் தெரிவித்தார். முதல்வரிடம் உள்ள துறைகளில் நடக்கும் டெண்டர் முறைகேடுகள் உள்ளிட்ட விவரங்களையும் விரைவில் வெளியிடுவோம் என்றும் அவர் கூறினார்.
