புதுடில்லி: காங்கிரஸ் தற்போது ‘புதிய முஸ்லிம் லீக் கட்சி’ போல மாறிவிட்டதாக பாஜ தலைவர் நிதின் நபின் குற்றம்சாட்டியுள்ளார். டில்லியில் நடைபெற்ற காங்கிரஸ் செயற்குழு கூட்டத்தில் நிறைவேற்றப்பட்ட தீர்மானத்தைத் தொடர்ந்து அவர் இந்த விமர்சனத்தை முன்வைத்தார்.
அந்த கூட்டத்தில், காங்கிரஸ் கூட்டங்களில் ‘வந்தே மாதரம்’ பாடலின் முதல் இரண்டு பத்திகள் மட்டுமே பாடப்படும் என தீர்மானம் நிறைவேற்றப்பட்டதாக அவர் குறிப்பிட்டார்.
தன் அறிக்கையில், இதுவரை நடந்ததாக கூறப்படும் அவமதிப்பை இப்போது காங்கிரஸ் ஒரு அதிகாரப்பூர்வ தீர்மானமாக “முறைப்படுத்தி” விட்டதாக நிதின் நபின் தெரிவித்தார். சில நாட்களுக்கு முன்பு ஒருவரின் நடத்தையில் வெளிப்பட்டதை தற்செயல் நிகழ்வாகக் கூறி புறக்கணித்ததாகவும், இப்போது அதே நிலை கட்சியின் கொள்கையாக மாறிவிட்டதாகவும் அவர் கூறினார்.
இது பாரத மாதாவுக்கு செய்யப்படும் அவமதிப்பாகவும், தேசியப் பாடலை நினைவில் உயிர்ப்புடன் வைத்துக் கொண்டு தேசத்திற்காக உயிர்தியாகம் செய்த ஆயிரக்கணக்கான தியாகிகளுக்கும் அவமதிப்பாகவும் அவர் விமர்சித்தார்.
மேலும், இது வெறும் அரசியல் தற்காப்பு அல்ல; வாக்கு வங்கி அரசியலின் தாக்கம் காங்கிரசில் வெளிப்படுகிறது என கூறிய அவர், காங்கிரஸ் இப்போது ‘புதிய முஸ்லிம் லீக்’ ஆக மாறியுள்ளதாக மீண்டும் குற்றம்சாட்டினார்.
