விநாயகர் சதுர்த்தியை முன்னிட்டு தமிழகம் முழுவதும் சுமார் 1.5 லட்சம் விநாயகர் சிலைகள் பிரதிஷ்டை செய்ய திட்டமிட்டுள்ளதாக ஹிந்து முன்னணி அறிவித்துள்ளது.
திருப்பூர் மாவட்டத்தின் அலகுமலை, வஞ்சிபாளையம் உள்ளிட்ட பகுதிகளில் சிலைகள் தயாரிக்கும் பணிகள் முழு வீச்சில் நடைபெற்று வருவதாகவும், செப்டம்பர் முதல் வாரத்துக்கு பிறகு மாநிலம் முழுவதும் அனுப்ப திட்டமிட்டுள்ளதாகவும் அமைப்பு தெரிவித்தது.
ஹிந்து முன்னணி தலைவர் காடேஸ்வரா சுப்ரமணியம் கூறுகையில், அனைத்து சிலைகளும் சுற்றுச்சூழலுக்கு பாதிப்பு இல்லாத வகையில் தயாரிக்கப்படுவதாக தெரிவித்தார். சிவரூப விநாயகர், தர்பார் விநாயகர், அன்ன வாகனம் விநாயகர், ஆதியோகி விநாயகர் உள்ளிட்ட பல வடிவங்களில் 3 அடி முதல் 10 அடி வரை சிலைகள் தயாராகியுள்ளதாகவும் கூறினார்.
அமைப்பின் தகவலின்படி, சுமார் 20 லட்சம் வீடுகளில் விநாயகர் சிலைகள் வைக்கப்படும்; 600 இடங்களில் விசர்ஜன ஊர்வலம் நடைபெற உள்ளது. திருப்பூர் நகரில் மட்டும் 1,008 சிலைகள் வைக்க திட்டமிடப்பட்டுள்ள நிலையில், மாவட்டம் முழுவதும் 5,000 சிலைகள் வரை வைக்கப்படும் என தெரிவிக்கப்பட்டது.
இவ்வாண்டு விநாயகர் சதுர்த்தி செப்டம்பர் 14ல் தொடங்கி ஒரு வாரம் கொண்டாடப்படும் என்றும், “தமிழர் பண்பாடும், சனாதன ஹிந்து மதமும் ஒன்று” என்ற கருப்பொருளில் நிகழ்ச்சிகள் நடைபெறும் என்றும் கூறப்பட்டது. விசர்ஜன ஊர்வலம் திருப்பூரில் செப். 17, கோவையில் செப். 18, சென்னையில் செப். 20ல் நடைபெற உள்ளது.
