மத்திய பாதுகாப்புத்துறை அமைச்சர் ராஜ்நாத் சிங், ‘வந்தே மாதரம்’ பாடலை காங்கிரஸ் கட்சி வெளிப்படையாக எதிர்ப்பதாகக் கூறி, அதை “துரதிர்ஷ்டவசமானது” என்றும் “அரசியலமைப்பு ரீதியாகக் கவலைக்குரியது” என்றும் விமர்சித்தார்.
இது பாடலை மதிக்க மறுப்பது மட்டுமல்ல; அதை வெளிப்படையாக எதிர்க்கும் நிலைப்பாடாகவும் இருப்பதாக அவர் கூறினார். தேசியப் பாடலை மதிக்க மறுப்பது தேசபக்தி குறித்த சந்தேகத்தை எழுப்பும் என்றும், அரசியலமைப்பின் மீது உள்ள விசுவாசத்தையும் கேள்விக்குள்ளாக்கும் என்றும் அவர் தெரிவித்தார்.
இந்திய அரசியலமைப்பின்படி பார்லிமன்றமே நாட்டின் மிக உயர்ந்த அமைப்பு; அது இயற்றும் சட்டங்கள் ஒவ்வொரு தனிமனிதருக்கும் கட்டுப்பட்டவை என ராஜ்நாத் சிங் குறிப்பிட்டார். இதை ஏற்க மறுப்பது அரசியலமைப்பு கட்டமைப்பின் மீதான நம்பிக்கையைப் பாதிக்கும் என்றும் கூறினார்.
காங்கிரஸ் குறிப்பிடும் 1937ஆம் ஆண்டுத் தீர்மானம், முஸ்லிம் லீக்கின் தீவிர கோரிக்கைகளுக்கு பணிந்த பின்னரே நிறைவேற்றப்பட்டதாக அவர் குற்றம்சாட்டினார். அத்தகைய சமரசங்களுக்கான விலையை நாடு பிரிவினை மூலம் சந்திக்க வேண்டியதாகி விட்டதாகவும், இன்று மீண்டும் அதே போக்கில் செல்லுவது நாட்டின் எதிர்காலத்திற்கு அச்சுறுத்தலாகும் என்றும் அவர் எச்சரித்தார்.
காங்கிரஸின் இந்த முடிவு அரசியலமைப்புக்கு முரணானதும் கண்டிக்கத்தக்கதுமென கூறிய ராஜ்நாத் சிங், இது எதிர்காலத்தில் தீவிர அரசியல் நெருக்கடியை உருவாக்கக்கூடும் என்றும், ‘வந்தே மாதரம்’ பாடலை எதிர்ப்பதன் மூலம் கட்சி தனது தவறான நோக்கங்களை வெளிப்படுத்தியதாகவும் தெரிவித்தார்.
