சென்னை: தமிழ்நாடு சட்டசபையில் சபாநாயகர் நீக்கும் வார்த்தைகள் கூட, நேரடி ஒளிபரப்பின் காரணமாக யூடியூப் மற்றும் சமூக வலைதளங்களில் குறும்பட ‘ரீல்ஸ்’ ஆக பரப்பப்படுவதால், நீக்குவதற்கான அர்த்தமே குறைந்து விடுகிறது என எதிர்க்கட்சி தலைவர் உதயநிதி வியாழக்கிழமை குற்றம்சாட்டினார்.
விவாதத்தின் போது, ஆளும் கட்சியினர் ஆதாரமின்றி குற்றச்சாட்டுகளை முன்வைப்பதாகவும், அவற்றை சபாநாயகர் நீக்குவதாகவும் அவர் கூறினார். மேலும், சட்டசபை வரலாற்றில் முதன்முறையாக எதிர்க்கட்சியைவிட ஆளும் கட்சியினர் பேசிய பகுதிகளே அதிகமாக நீக்கப்படுவதாகவும் அவர் வாதிட்டார்.
இதற்கு அமைச்சர்கள் பதிலளிக்கையில், சட்டசபை நிகழ்ச்சிகளின் நேரடி ஒளிபரப்பு தற்போதைய ஆட்சியில்தான் தொடங்கியதாகவும், 2021 தேர்தல் வாக்குறுதியின்படி தி.மு.க. நேரடி ஒளிபரப்பை நடைமுறைப்படுத்தவில்லை என்றும் கூறினர். மேலும், மக்கள் குடும்பத்துடன் சட்டசபை நிகழ்ச்சிகளை நேரடியாக பார்க்கத் தொடங்கியுள்ளதாக ஒரு அமைச்சர் குறிப்பிட்டார். கருத்துகளை சொல்லும் போது பாடல் பாடுவதில் தவறு இல்லை என சபாநாயகர் தெரிவித்தார்.
சபாநாயகர் பிரபாகர், வார்த்தைகளை நீக்குவது தனது அதிகாரம் என்றும், சபைக்கு உதவாததும் சபையின் மாண்பை குறைக்கும் வகையிலான கருத்துகளையே நீக்குவேன் என்றும் கூறினார். நீக்கப்பட்ட காட்சி ஒரு ஊடகத்தில் ஒளிபரப்பப்பட்டதாக எதிர்க்கட்சி தரப்பில் கடிதம் வந்துள்ளதாகவும், அது உரிமை மீறல் குழுவுக்கு அனுப்பப்பட்டு நடவடிக்கை எடுக்கப்படும் என்றும் அவர் தெரிவித்தார்.
