ஆக.19 அன்று சட்டசபையில் ஊரக வளர்ச்சி மற்றும் நீர்வளத் துறை மானியக் கோரிக்கைகள் மீதான விவாதத்தில், அமைச்சர் ஆனந்த் சுமார் 70 நிமிடங்கள் பதிலுரை வழங்கியது த.வெ.க. வட்டாரத்தில் புதிய பேசுபொருளாகியுள்ளது.
அந்த உரையில் துறை சார்ந்த அம்சங்களைத் தாண்டி, த.வெ.க.க்காக தாம் செய்த பணிகள் குறித்து அவர் விரிவாகக் குறிப்பிட்டார். யார் யாரை கட்சிக்கு கொண்டு வந்தார், யாருக்கு சட்டசபைத் தேர்தலில் போட்டியிட வாய்ப்பு கிடைக்க உதவினார் என்பதையும் அவர் பட்டியலிட்டதாக தகவல் வெளியாகியுள்ளது.
இதுகுறித்து த.வெ.க. நிர்வாகிகள் கூறியதாக வெளியான தகவலில், முதல்வர் விஜயுடன் 28 ஆண்டுகளாக தொடர்ந்து பயணித்துவரும் ஆனந்த், அமைச்சரவையில் முக்கிய இடத்தில் இருப்பவர் என்றாலும், முதல்வரைச் சுற்றியுள்ள சிலரின் தாக்கத்தால் தற்போது அவர் ஓரங்கட்டப்படுவதாக கூறப்படுகிறது. கட்சியின் பொதுச்செயலராக அவர் முன்வைக்கும் “நியாயமான சிபாரிசுகள்” கூட நிறைவேறாமல் போவதாகவும் அவர்கள் தெரிவித்தனர்.
மேலும், மாவட்ட செயலர்கள் மற்றும் எம்.எல்.ஏ.க்கள் முதல்வரை சந்திப்பதற்கே தடைகள் இருப்பதாகவும், ரசிகர் மன்ற நிர்வாகிகளின் கோரிக்கைகளை நிறைவேற்ற முடியாத மனவருத்தத்தில் ஆனந்த் இருப்பதாகவும் கூறப்படுகிறது. தன் துறையின் செயலரை மாற்றிய விவரம் கூட தமக்குத் தெரியாமல் நடந்ததாக அவர் வேதனையுடன் தெரிவித்ததாகவும் அந்த தகவலில் குறிப்பிடப்பட்டுள்ளது.
இந்த பின்னணியில்தான், த.வெ.க.க்காக தாம் செய்தவற்றையும், ரசிகர் மன்றங்களில் உள்ள “உண்மையான விஜய் ஆதரவாளர்கள்” மனப்புழுக்கத்தையும் சுட்டிக்காட்டவே, எந்த குறிப்பும் இல்லாமல் நீண்ட நேரம் மனதில் இருந்ததை வெளிப்படுத்தினார் என நிர்வாகிகள் கூறியதாக தெரிவிக்கப்பட்டுள்ளது. இதன் தொடர்ச்சியாக முதல்வர் விஜய் என்ன நடவடிக்கை எடுப்பார் என்பதை கட்சி வட்டாரம் எதிர்பார்த்து இருப்பதாகவும் கூறப்படுகிறது.
