இந்தியா–சீனா எல்லைப் பிரச்னை தொடர்பான 25வது சிறப்பு பிரதிநிதிகள் (SR) பேச்சுவார்த்தையில் பங்கேற்க தேசிய பாதுகாப்பு ஆலோசகர் அஜித் தோவல் ஆக.24 அன்று பீஜிங் செல்ல உள்ளார்.
இந்தியா மற்றும் சீனா 3,488 கி.மீ. நீளமான எல்லையை பகிர்ந்து கொள்கின்றன. எல்லை தொடர்பான பிரச்னைகளுக்கு தீர்வு காண 2003ஆம் ஆண்டு முதல் சிறப்பு பிரதிநிதிகள் பேச்சுவார்த்தை முறை நடைமுறையில் உள்ளது.
இந்தியாவின் சிறப்பு பிரதிநிதியாக அஜித் தோவல் செயல்படுகிறார். சீனாவின் சார்பில் வெளியுறவு அமைச்சர் வாங் யீ சிறப்பு பிரதிநிதியாக உள்ளார். பீஜிங்கில் இருவரும் சந்தித்து விவாதிக்க உள்ளனர்.
2020ஆம் ஆண்டு கிழக்கு லடாக்கின் கல்வான் பகுதியில் ஏற்பட்ட மோதலுக்குப் பிறகு இருநாட்டு உறவு பாதிக்கப்பட்டது. அதன் பின்னர் அமைதி மற்றும் ஸ்திரத்தன்மை ஏற்படுத்த சிறப்பு பிரதிநிதிகள் பேச்சுவார்த்தை, ராணுவ தளபதிகள் சந்திப்பு, மேலும் எல்லை விவகாரங்களுக்கான ஆலோசனை மற்றும் ஒருங்கிணைப்பு அமைப்பு வழியாக தொடர்ந்து உரையாடல்கள் நடைபெற்று வருகின்றன.
25வது சிறப்பு பிரதிநிதிகள் பேச்சுவார்த்தை ஆக.25 அன்று நடைபெற உள்ள நிலையில், அஜித் தோவலின் இந்தப் பயணம் எல்லை நிலவரம் தொடர்பான விவாதங்களை முன்னெடுக்க உதவும் என தெரிவிக்கப்பட்டுள்ளது.
