கேரள பல்கலை துணைவேந்தர் மோகனன் குன்னும்மல், சில வெளிநாட்டு சக்திகள் இளைஞர்களை தவறான பாதைக்கு இட்டுச் சென்று போதைப்பொருள் அடிமைத்தனத்தில் தள்ளி “அழிக்க” முயல்கின்றன என்று குற்றம்சாட்டினார். இதுபோன்ற தாக்கங்களை கட்டுப்படுத்த நடவடிக்கைகள் மேற்கொள்ளப்பட்டு வருவதாகவும் அவர் தெரிவித்தார்.
திருவனந்தபுரத்தில் பேசிய அவர், சமீபகாலமாக மாணவர்கள் திசைதிருப்பப்படுவதாகக் கூறி, இதை எதிர்த்து நிற்பது துணைவேந்தராக தன் கடமை என்றார். மாணவர்கள் வலிமையானவர்கள்; அவர்களை இழிவுபடுத்தக் கூடாது என்ற கருத்தையும் அவர் மீண்டும் வலியுறுத்தினார்.
இதற்கு முன், போட்டித் தேர்வுகளில் வெற்றி பெற்ற மாணவர்களை கவுரவிக்கும் நிகழ்ச்சியில் “மாணவர்கள் கரப்பான்பூச்சிகள் அல்ல; வலிமையான சிங்கங்கள்” என்று அவர் கூறியிருந்தார். டில்லியில் நடந்த ஒரு போராட்டத்தை ஒட்டி அந்த கருத்து மறைமுக விமர்சனமாக இருந்ததாக சிலர் கூறியதைத் தொடர்ந்து எதிர்ப்புகள் எழுந்தன. இந்திய மாணவர்கள் கூட்டமைப்பு உள்ளிட்ட மாணவர் அமைப்புகள் அவருக்கு எதிராக போராட்டங்களிலும் ஈடுபட்டன.
தனியார் தொலைக்காட்சி நிகழ்ச்சியில் பேசிய மோகனன், தன் கருத்துகளை தீய நோக்கத்துடன் சிலர் திரித்து சர்ச்சையாக்குவதாக கூறினார். அமெரிக்காவில் இருந்து ஒரு இளைஞர் வருவது மற்றும் அவருக்கு ஆதரவு கிடைப்பது போன்ற நிகழ்வுகளை சுட்டிக்காட்டி, இவை தற்செயலானவை அல்ல; பல்கலை துணைவேந்தராக இதைப் பற்றி சிந்தித்து நடவடிக்கை எடுக்க வேண்டும் என்றார்.
மேலும், ‘வந்தே மாதரம்’ பாடலை எதிர்ப்பவர்கள் குறித்து அவர் கூறியதாக வந்த விமர்சனங்களுக்கு பதிலளித்து, தன் வார்த்தைகள் தவறாக புரிந்து கொள்ளப்பட்டதாகவும் தெரிவித்தார்.
