சென்னை வானிலை ஆய்வு மையம் (RMC) வெளியிட்ட எச்சரிக்கையில், ஆகஸ்ட் 23 (சனி) அன்று தமிழகத்தின் 10 மாவட்டங்களில் இடி, மின்னலுடன் கூடிய லேசான மழைக்கு வாய்ப்பு இருப்பதாக தெரிவித்துள்ளது.
அறிக்கையில், கடந்த சில நாட்களாக மாநிலத்தின் பல பகுதிகளில் லேசான மழை பெய்து வருவதாக கூறப்பட்டுள்ளது. வெள்ளிக்கிழமை அதிகபட்சமாக செங்கல்பட்டு மாவட்டத்தில் வி.ஐ.டி. கல்வி நிறுவனப் பகுதியில் 6 செ.மீ. மழை பதிவானது. விழுப்புரம் மாவட்டம் திண்டிவனம், சென்னை சோழிங்கநல்லூர் மற்றும் ராணிப்பேட்டை பகுதிகளில் தலா 3 செ.மீ. மழை பெய்துள்ளதாகவும் குறிப்பிடப்பட்டுள்ளது.
தமிழக கடலோர பகுதிகளில் கீழ்மட்ட வளிமண்டலத்தில் பலவீனமான காற்றழுத்தத் தாழ்வு பாதை நிலவுவதால் இந்த மழை வாய்ப்பு உருவாகியுள்ளதாக வானிலை மையம் தெரிவித்தது. இதன் காரணமாக மேற்கு தொடர்ச்சி மலை மாவட்டங்கள் மற்றும் சென்னை, செங்கல்பட்டு, திருவள்ளூர், காஞ்சிபுரம், ராணிப்பேட்டை, வேலூர், திருவண்ணாமலை, விழுப்புரம், கள்ளக்குறிச்சி, கடலூர் மாவட்டங்களில் ஆக.23 அன்று இடி, மின்னலுடன் லேசான மழைக்கு வாய்ப்பு உள்ளது.
ஆகஸ்ட் 24 (ஞாயிறு) அன்று கோவை மாவட்ட மலைப்பகுதிகள் மற்றும் நீலகிரி மாவட்டத்தில் இடி, மின்னலுடன் கனமழைக்கு வாய்ப்பு இருப்பதாகவும் கூறப்பட்டுள்ளது. மேலும் மற்ற மேற்கு தொடர்ச்சி மலை மாவட்டங்கள் மற்றும் செங்கல்பட்டு, சென்னை, திருவள்ளூர், காஞ்சிபுரம், ராணிப்பேட்டை, வேலூர், திருவண்ணாமலை, விழுப்புரம், கள்ளக்குறிச்சி, கடலூர், அரியலூர், பெரம்பலூர், மயிலாடுதுறை, திண்டுக்கல், மதுரை, சிவகங்கை, புதுக்கோட்டை மாவட்டங்களிலும் இடி, மின்னலுடன் லேசான மழை பெய்யக்கூடும் என தெரிவிக்கப்பட்டுள்ளது.
தென்மேற்கு பருவமழை நிலவரம் குறித்து, ஜூன் 1 முதல் ஆகஸ்ட் 22 வரை தமிழகத்தில் 15 செ.மீ. மழை பெய்துள்ளதாகவும், இதே காலத்தின் இயல்பான அளவு 18 செ.மீ. என்பதால் இயல்பை விட சுமார் 17% குறைவாக பதிவாகியுள்ளது என்றும் வானிலை மையம் தெரிவித்துள்ளது.
