திருச்சி மாவட்டம் முசிறி அருகே எம்.புதுப்பட்டியில் வழக்கறிஞர் ராஜு ஜோசப் நடத்தும் ‘ஐந்திணை பண்ணை’யின் நோக்கம், கழுதை வளர்ப்பும் ஒரு லாபகரமான தொழிலாக இருக்க முடியும் என்பதை நிரூபிப்பதோடு, காணாமலாகி வரும் கழுதை இனத்தை பாதுகாப்பதுமாகும்.
பொதி சுமக்கும் விலங்காக மட்டுமே அறியப்பட்ட கழுதைகள், ஒருகாலத்தில் விவசாயப் பணிகளிலும் பயன்படுத்தப்பட்டதாக அவர் குறிப்பிடுகிறார். இன்றைய இயற்கை விவசாயத்தில் கழுதை கோமியம் பூச்சி விரட்டியாகவும், பயிர் ஊக்கியாகவும் பயன்படுகிறது என்பதும் இந்த முயற்சிக்கு ஊக்கமளித்ததாக அவர் கூறுகிறார்.
2018ல் பண்ணையை தொடங்குவதற்காக கழுதைகளைத் தேடி அலைந்தபோது, தென்மாவட்டங்களில் நோய்வாய்ப்பட்ட நிலையில் இருந்த எட்டு மூப்பேறிய கழுதைகள் கிடைத்தன. அவற்றை அடிப்படையாகக் கொண்டு பண்ணை உருவாக்கப்பட்டு, பின்னர் படிப்படியாக வளர்ச்சி கண்டுள்ளது.
இங்கு கழுதைப்பால் நேரடியாக விற்பனை செய்யப்படுவதுடன், பவுடர், சோப், பாடி வாஷ் போன்ற மதிப்புக்கூட்டப்பட்ட சரும பராமரிப்பு பொருட்களாகவும் தயாரிக்கப்படுகிறது. மேலும் சாணத்தில் இருந்து தயாரிப்புகளும், கழுதை முடி கொண்டு தாயத்துகளும் உருவாக்கப்படுகின்றன; இத்தயாரிப்புகளுக்கு மாநில அரசின் அனுமதி பெறப்பட்டுள்ளதாக தெரிவிக்கப்படுகிறது.
எட்டு கழுதைகளுடன் தொடங்கிய பண்ணையில் தற்போது 25 கழுதைகள் உள்ளன; இதில் குஜராத் ஹலாரி இனத்தைச் சேர்ந்த இரண்டு கழுதைகளும் அடங்கும். கழுதை வளர்ப்பு மற்றும் மதிப்புக்கூட்டப்பட்ட பொருள் தயாரிப்பு குறித்து ஆன்லைன் மற்றும் நேரடி பயிற்சி வகுப்புகளையும் ராஜு ஜோசப் நடத்தி வருகிறார்.
