புதுப்பிக்கத்தக்க மின்சார நிறுவு திறனில் குஜராத் மற்றும் ராஜஸ்தான் மாநிலங்கள் தலா 50,000 மெகாவாட்டை கடந்துள்ளன. இதனால் நாட்டின் முன்னணி மாநிலங்களாக அவை முன்னேறியுள்ள நிலையில், காற்றாலை–சூரியசக்திக்கு சாதகமான சூழல் இருந்தும் தமிழகம் சுமார் 29,802 மெகாவாட்டுடன் 4-ம் இடத்தில் உள்ளது.
நாட்டின் மின்தேவையை பூர்த்தி செய்ய சூரியசக்தி, காற்றாலை, சிறிய நீர்மின் நிலையங்கள், பயோ மின்சாரம் போன்ற புதுப்பிக்கத்தக்க ஆதாரங்களை அதிகரிக்க மாநிலங்களுக்கு மத்திய மின்துறை அறிவுறுத்தி வருகிறது. இதன் காரணமாக பல நிறுவனங்கள் சூரிய மற்றும் காற்றாலை திட்டங்களை அமைக்க ஆர்வம் காட்டுகின்றன.
2025 செப்டம்பர் நிலவரப்படி ராஜஸ்தானின் புதுப்பிக்கத்தக்க மின் நிறுவு திறன் 40,406 மெகாவாட்டாகவும், குஜராத் 40,019 மெகாவாட்டாகவும், தமிழகம் 26,588 மெகாவாட்டாகவும் இருந்தது. கடந்த மாத நிலவரத்தில் குஜராத் மற்றும் ராஜஸ்தான் இரண்டும் 50,000 மெகாவாட்டை கடந்துள்ளன; பின்னர் குஜராத் 52,610 மெகாவாட்டுடன் முதலிடத்தை பிடித்ததாக தெரிவிக்கப்பட்டுள்ளது.
2025 செப்டம்பருடன் இந்தாண்டு ஜூலை நிலவரத்தை ஒப்பிடும் போது 10 மாதங்களில் குஜராத் 12,591 மெகாவாட், ராஜஸ்தான் 9,929 மெகாவாட் கூடுதலாக நிறுவியுள்ளது. அதே காலத்தில் தமிழகத்தில் 3,214 மெகாவாட் மட்டுமே கூடுதலாக நிறுவப்பட்டுள்ளது.
தமிழக முதலீட்டாளர்கள் கூறுகையில், காற்றாலை மற்றும் சூரியசக்தி திட்டங்களுக்கு தமிழகம் வானிலை ரீதியாக முன்னணியில் இருந்தாலும், அனுமதி வழங்குவதில் தாமதம் ஏற்படுகிறது என்றனர். இதனால் திட்டங்களை அமைக்க விரும்பும் நிறுவனங்கள் பிற மாநிலங்களுக்கு செல்லும் நிலை உருவாகலாம்; முதலீடுகளை ஈர்க்க ஒப்புதல்களை விரைவுபடுத்த வேண்டும் என்றும் அவர்கள் வலியுறுத்தினர்.
