மதுரையில் தொழில் துறையினர், சுற்றுச்சூழல் பாதுகாப்புக்காக முதலீடு செய்து அமைப்புகளை நிறுவும் எம்.எஸ்.எம்.இ. நிறுவனங்களை தமிழக அரசு போதுமான அளவில் கவனிக்கவில்லை என்றும், குறிப்பாக மானியம் பெறும் நடைமுறையில் சிக்கல்கள் இருப்பதாகவும் குற்றம்சாட்டினர்.
தமிழகத்தில் பல சிறு, குறு மற்றும் நடுத்தரத் தொழில் நிறுவனங்கள் ‘ஜீரோ லிக்விட் டிஸ்சார்ஜ்’ (இசட்.எல்.டி.) உள்ளிட்ட கழிவுநீர் சுத்திகரிப்பு மற்றும் மறுசுழற்சி யூனிட்களை அமைத்துள்ளன. தொழிற்சாலை கழிவுகளை நேரடியாக வெளியேற்றாமல் சுத்திகரித்து மீண்டும் பயன்படுத்துவதன் மூலம் காற்று, நீர், மண் மாசுபாடு குறைவதாக அவர்கள் தெரிவித்தனர்.
இந்த அமைப்புகளுக்கான மானியம் மாவட்ட தொழில் மையங்கள் மூலம் பெறப்படுகின்ற நிலையில், தமிழ்நாடு மாசுக் கட்டுப்பாட்டு வாரியத்திலிருந்து பெற வேண்டிய சான்றிதழ் நடைமுறை கடினமாக இருப்பதால், யூனிட் அமைத்த பின்னும் மானியம் கிடைக்காமல் போகிறது என கூறினர்.
மானியம் சரியான நேரத்தில் கிடைத்தால் தான் யூனிட் அமைப்பதற்காக எடுத்த கடனை திருப்பிச் செலுத்தி கூடுதல் வட்டி சுமையை தவிர்க்க முடியும் என்றும், மாசுக் கட்டுப்பாட்டு வாரியம் வழங்கும் ஆய்வு/விவர ஆவணங்களை மாவட்ட தொழில் மையங்கள் நேரடியாக ஏற்கும் நடைமுறை கொண்டுவர வேண்டும் என்றும் அவர்கள் வலியுறுத்தினர். மேலும், மாசுக் கட்டுப்பாட்டு வாரியம் மற்றும் மாவட்ட தொழில் மையங்கள் இணைந்து ஒரே மாதிரியான (யுனிபைடு) சான்றிதழ் முறையை உருவாக்கினால் மானியம் பெறுவது எளிதாகும் என்றனர்.
சுற்றுச்சூழல் சட்ட விதிகளைப் பின்பற்றி இயங்கும் எம்.எஸ்.எம்.இ. நிறுவனங்கள் உற்பத்திச்செலவு, நடைமுறை மூலதனச் செலவுகளுடன் கூட, சுத்திகரிப்பு யூனிட்களுக்கும் லட்சக்கணக்கில் செலவிட வேண்டியிருப்பதாகவும், இதன் மூலம் வேலைவாய்ப்பும் உருவாகிறது என்றும் தெரிவித்தனர். எனவே இசட்.எல்.டி., இ.டி.பி., எஸ்.டி.பி. உள்ளிட்ட மாசுக் கட்டுப்பாட்டு உபகரணங்களுக்கு 90 சதவீதம் வரை சிறப்பு மூலதன மானியம் வழங்கும் வகையில் ‘பசுமை மானியம்’ என்ற புதிய திட்டத்தை அரசு உருவாக்க வேண்டும் என கோரிக்கை வைத்தனர்.
