புதுடில்லி: ஒடிசா மாநிலம் புவனேசுவரைச் சேர்ந்த இரட்டை சகோதரிகள் நிஷிதா மற்றும் நிகிதா, பேட்டரி தொழில்நுட்பத்தில் செய்த புதுமையான முயற்சிக்காக ‘போர்ப்ஸ் இந்தியா 30 அண்டர் 30’ பட்டியலில் இடம்பிடித்துள்ளனர்.
இவர்கள் தொடங்கிய டீப்-டெக் ஸ்டார்ட்அப் நிறுவனம் ‘நெக்ஸஸ் பவர்’. பயிர் கழிவுகளை பயன்படுத்தி மின்சார வாகனங்களுக்கு ஏற்ற, சுற்றுச்சூழலுக்கு உகந்த பேட்டரிகளை உருவாக்கும் தொழில்நுட்பத்தை இவர்கள் உருவாக்கியதாக தெரிவிக்கப்பட்டுள்ளது.
இந்த முயற்சியை பாராட்டி போர்ப்ஸ் இந்தியா மற்றும் போர்ப்ஸ் ஆசியா ‘30 அண்டர் 30’ தொழில் முனைவோர் பட்டியல்களில் இவர்களின் பெயர் சேர்க்கப்பட்டுள்ளது. 20 வயதான இவர்கள், பேஷன் மற்றும் நடன வீடியோக்கள் மூலம் சமூக ஊடகங்களில் கோடிக்கணக்கான பார்வைகளைப் பெற்று கவனம் ஈர்த்துள்ளனர்.
மேலும், முன்னணி உலகளாவிய ஆடம்பர பிராண்டுகளின் விளம்பரங்களில் பங்கேற்றதன் பின்னணியில், 2026 ஆம் ஆண்டின் போர்ப்ஸ் ‘30 அண்டர் 30’ சர்வதேசப் பட்டியலிலும் மிக இளைய சாதனையாளர்களில் ஒருவராக இடம்பெற்றதாக செய்தி கூறுகிறது.
நிஷிதா கூறியதாக வெளியான தகவலில், 13 அல்லது 14 வயதில் தொழில்முறை கலந்துரையாடல்களில் ஈடுபட்டது தங்களுக்கு தன்னம்பிக்கையை அளித்ததாகவும், ஆரம்பத்தில் மின்சார வாகனங்களை உருவாக்க நினைத்தபோது பேட்டரிதான் மிகப் பெரிய சவால் என்பதை உணர்ந்து அதில் கவனம் செலுத்தத் தொடங்கியதாகவும் குறிப்பிடப்பட்டுள்ளது.
