சென்னை: கோவில்களில் மொபைல் போன் கொண்டு செல்லக் கூடாது என்ற விதிமுறை பக்தர்களுக்கு தேவையற்ற சிரமத்தை உருவாக்குகிறது என்று ‘வி தி லீடர்ஸ்’ அமைப்பின் நிறுவனர் அண்ணாமலை தெரிவித்துள்ளார்.
அவர் வெளியிட்ட அறிக்கையில், இந்த கட்டுப்பாட்டால் ரூ.5 டோக்கன் பெறுவதற்கே நீண்ட வரிசையில் காத்திருக்க வேண்டிய நிலை ஏற்பட்டுள்ளதாக குறிப்பிட்டார். நிம்மதியாக தரிசனம் செய்ய வரும் பக்தர்களுக்கு இந்த ஏற்பாடு கூடுதல் பதற்றத்தையும் சிரமத்தையும் தருவதாகவும் கூறினார்.
மக்களின் ஆன்மிக நம்பிக்கையையும் வழிபாட்டு உரிமையையும் எளிதாக்குவதற்காகவே கோவில் நிர்வாக விதிமுறைகள் இருக்க வேண்டும்; கோவிலுக்குச் செல்வதையே யோசிக்க வைக்கும் அளவுக்கு அவை தடையாக மாறக் கூடாது என்றும் அவர் வலியுறுத்தினார்.
ஒருசிலரின் தவறுகளுக்காக லட்சக்கணக்கான பக்தர்களுக்கு சிரமம் ஏற்படுத்துவது சரியல்ல என கூறிய அண்ணாமலை, தமிழக அரசு இந்த விதிமுறையை உடனடியாக மறுபரிசீலனை செய்து, பக்தர்களுக்கு சிரமம் தரும் நடைமுறையைத் திரும்பப் பெற வேண்டும் என்று கேட்டுக்கொண்டார். கோவில்கள் நிம்மதியையும் இறைநம்பிக்கையையும் தரும் இடங்களாக இருக்க வேண்டும்; பதற்றமும் நீண்ட வரிசைகளும் உருவாகும் இடங்களாக அல்ல என்றும் அவர் தெரிவித்தார்.
