சென்னை: முந்தைய ஆட்சிக் காலத்தில் விவசாயிகள் மற்றும் ஆசிரியர்கள் மீது பதிவு செய்யப்பட்ட வழக்குகளை திரும்பப் பெற அரசு முடிவு செய்துள்ளதாக, தமிழக முதல்வர் விஜய் சட்டசபையில் 110 விதியின் கீழ் அறிவித்தார்.
சட்டத்திற்குட்பட்டு மக்கள் தங்கள் கோரிக்கைகளை முன்வைக்க அரசு சூழலை உறுதிப்படுத்தி வருவதாக அவர் கூறினார். 2021 முதல் 2026 ஏப்ரல் வரை வாழ்வாதாரம், உரிமைகள், சமூக நலன் தொடர்பான கோரிக்கைகளை முன்வைத்து போராடிய விவசாயிகள், ஆசிரியர்கள் மீது பல வழக்குகள் பதிவு செய்யப்பட்டதாகவும், இதனால் அவர்கள் சிரமங்களுக்கும் மன உளைச்சலுக்கும் ஆளானதாகவும் தெரிவித்தார்.
திருவண்ணாமலையில் சிப்காட் தொழிற்பேட்டை எதிர்ப்பு போராட்டத்தில் ஈடுபட்ட விவசாயிகள் மீது குண்டர் தடுப்பு சட்டம் பயன்படுத்தப்பட்டதையும், பரந்தூரில் புதிய விமான நிலையத் திட்டத்தை கைவிடக் கோரி நடந்த போராட்டங்கள் தொடர்பான வழக்குகள் நிலுவையில் இருப்பதையும் அவர் குறிப்பிட்டார். ஆசிரியர்கள் தங்கள் நியாயமான கோரிக்கைகளுக்காக ஜனநாயக முறையில் போராடியபோது அவர்கள்மீதும் வழக்குகள் நிலுவையில் உள்ளதாகவும் கூறினார்.
அறிவிப்புக்குப் பிறகு சட்டசபையில் விவாதம் நடைபெற்றது. தி.மு.க. உறுப்பினர் வேலு, வழக்குகள் திரும்பப் பெறுவதில் மாற்றுக் கருத்தில்லை என்றாலும், நிலம் கையகப்படுத்தல் போன்ற திட்டங்களில் போராட்டங்கள் நடந்தால் சட்டம்-ஒழுங்கை எப்படி காக்கப்படும் என கேள்வி எழுப்பினார். அமைச்சர்கள் ஆதவ் அர்ஜுனா மற்றும் நிர்மல்குமார், அரசு சட்ட நடைமுறைகள் வழியாக போராட்ட வழக்குகளை திரும்பப் பெற நடவடிக்கை எடுக்கப்படும் என்றனர். எதிர்க்கட்சி தலைவர் உதயநிதி, முந்தைய தி.மு.க. அரசு பல்வேறு போராட்டங்கள் தொடர்பாக 5,000க்கும் அதிகமான வழக்குகளை திரும்பப் பெற்றதை நினைவூட்டினார்; மேலும் தி.மு.க. உறுப்பினர் எம்.ஆர்.கே. பன்னீர்செல்வம், தற்போதைய ஆட்சியின் முதல் 100 நாட்களில் விவசாய கடன் தள்ளுபடி கோரி போராடியவர்கள்மீது பதிந்த வழக்குகளும் திரும்பப் பெறப்படுமா என கேட்டார்.
