புதுடில்லி: இந்தியா–பாகிஸ்தான் எல்லை அருகே பெரிய அளவிலான பயிற்சியை நடத்த இந்திய விமானப்படை (IAF) அறிவிப்பு வெளியிட்டுள்ளது. இதனால் அக்கரையில் கவனம் அதிகரித்துள்ளதாக தகவல்கள் தெரிவிக்கின்றன.
விமானப் போக்குவரத்துக்கான NOTAM அறிவிப்பின்படி, செப்டம்பர் 21 முதல் அக்டோபர் 7 வரை சுமார் 17 நாட்கள் இந்தப் பயிற்சி நடைபெற உள்ளது. ஜெய்சால்மர்–பார்மர்–பலோடி–ஜோத்பூர் செக்டார் மற்றும் நல்–பிகானீர் பகுதிகளை உள்ளடக்கிய வான்வெளியில் பயிற்சி நடத்த திட்டமிடப்பட்டுள்ளது.
இந்தப் பயிற்சியில் சுமார் 40,000 அடி உயரம் வரை போர் சார்ந்த டிரில்கள் நடைபெறும் என கூறப்படுகிறது. அறிவிக்கப்பட்ட வான்வெளி பகுதி சர்வதேச எல்லைக்கு அருகில், சுமார் 20 கி.மீ. தூரத்தில் இருப்பதாகவும் தெரிவிக்கப்பட்டுள்ளது.
இந்த அறிவிப்பு பாகிஸ்தானில் அச்சம் மற்றும் பதற்றத்தை ஏற்படுத்தியதாக அந்த செய்தி கூறுகிறது. இந்தியாவின் நடவடிக்கையை ஆய்வு செய்து கண்காணிக்க பாகிஸ்தான் பாதுகாப்பு அதிகாரிகள் அவசரக் கூட்டம் நடத்தியதாகவும் குறிப்பிடப்பட்டுள்ளது.
மேலும், “ஆபரேஷன் சிந்தூர்” நடவடிக்கைக்கு பிறகு எல்லைப் பாதுகாப்பு முன்னெப்போதும் இல்லாத வகையில் பலப்படுத்தப்பட்டுள்ளதாகவும், இந்தியாவின் அடுத்தடுத்த நடவடிக்கைகளை பாகிஸ்தான் கவனித்து வருவதாகவும் தகவல்கள் தெரிவிக்கின்றன.
