தமிழ்நாட்டில் சட்டசபை நிகழ்ச்சிகளை நேரடியாக ஒளிபரப்பும் முடிவு குறித்து பொதுமக்களிடையே பரவலான விவாதம் எழுந்துள்ளது. எடிட்டிங் செய்யப்பட்ட காட்சிகள் அல்லாமல், சட்டசபையில் உண்மையில் என்ன நடக்கிறது என்பதை நேரடியாக பார்க்க முடிவதால் இது வெளிப்படையான நிர்வாகத்திற்கான முக்கிய முன்னேற்றம் என பலர் கருத்து தெரிவித்தனர்.
நேரம் கிடைக்கும் போதெல்லாம் வீட்டிலும், வேலை இடங்களிலும், கைபேசியிலும் சட்டசபை நேரலையைப் பார்க்கிறோம் என சிலர் கூறினர். டீக்கடை, பேருந்து போன்ற இடங்களிலும் மக்கள் தொடர்ந்து கவனிப்பதாகவும், குடும்பத்துடன் குழந்தைகளும் சேர்ந்து பார்ப்பது அரசியல் விழிப்புணர்வை உயர்த்துவதாகவும் சிலர் சுட்டிக்காட்டினர்.
அதே நேரத்தில், சட்டசபை விவாதங்கள் பல நேரங்களில் மக்கள் பிரச்னைகளை விட கட்சி பெருமை பேசுதல், குற்றச்சாட்டு-எதிர்க்குற்றச்சாட்டு, தேவையற்ற வாக்குவாதம் ஆகியவற்றில் சிக்குவதாக சிலர் அதிருப்தி தெரிவித்தனர். எதிர்க்கட்சியின் கேள்விகளுக்கு அமைச்சர்கள் தெளிவாக பதில் அளிக்காமல் திசை திருப்புவதால் இடையூறுகள் அதிகரிக்கின்றன என்ற கருத்தும் முன்வைக்கப்பட்டது.
நேரலை ஒளிபரப்பால் தங்கள் தொகுதி எம்.எல்.ஏ. என்ன பேசுகிறார், மற்ற உறுப்பினர்கள் எப்படி செயல்படுகிறார்கள் என்பதையும் ஒப்பிட்டு பார்க்க முடிகிறது என சிலர் கூறினர். ஒளிபரப்பு தொடர வேண்டும் என்றாலும், மக்கள் பார்த்துக் கொண்டிருக்கிறார்கள் என்ற உணர்வுடன் உறுப்பினர்கள் பொறுப்புடன் பேசினால் தான் இதன் பயன் அதிகரிக்கும் எனவும் அவர்கள் வலியுறுத்தினர்.
